Takim i SHGM-së me gazetarë dhe punonjës mediatikë nga rajoni i Pollogut

Qasja në informacione, komunikimi me institucionet lokale, siguria e gazetarëve, kushtet e punës dhe statusi shumëvjeçar i korrespondentëve ishin ndër temat kryesore të takimit të Shoqatës së Gazetarëve të Maqedonisë (SHGM) me gazetarë dhe punonjës mediatikë nga Qendra Rajonale e Pollogut në Tetovë.

Kryetari i SHGM-së, Mlladen Çadikovski, së bashku me përfaqësues të zyrës së SHGM-së, diskutoi me të pranishmit për problemet konkrete me të cilat përballen gazetarët në rajon, si dhe për mundësitë që SHGM-ja të ofrojë mbështetje për zgjidhjen e tyre.

Vëmendje e veçantë iu kushtua incidenteve të fundit të raportuara nga një pjesë e anëtarësisë në rajon dhe veprimeve të institucioneve kompetente në këto raste. Gazetarët ndanë përvojat e tyre dhe theksuan nevojën që institucionet të veprojnë më seriozisht dhe në kohë kur bëhet fjalë për presione, kërcënime apo forma të tjera të pengimit të punës së tyre.

U diskutua gjithashtu edhe çështja e statusit të korrespondentëve, të cilët vazhdojnë të punojnë shpesh në kushte specifike, pa një status mjaftueshëm të qartë profesional dhe të punës, si dhe me mbështetje të kufizuar nga redaksitë amë. Në këtë kontekst u theksua rëndësia që gazetarët nga rajonet të kenë komunikim të drejtpërdrejtë me SHGM-në dhe mundësi që në kohë të kërkojnë këshillim, mbështetje juridike apo forma të tjera të mbështetjes profesionale.

Kryetari i SHGM-së theksoi se komunikimi i drejtpërdrejtë me anëtarësinë është i rëndësishëm për identifikimin në kohë të problemeve lokale dhe përcaktimin e fushave konkrete në të cilat Shoqata mund të ndihmojë.

Takime të tilla janë pjesë e praktikës së rregullt të SHGM-së për përfshirjen më të madhe të gazetarëve dhe punonjësve mediatikë jashtë Shkupit, njohjen më të mirë me sfidat me të cilat përballen në nivel lokal dhe identifikimin e çështjeve për të cilat SHGM-ja mund të ofrojë mbështetje. Gjatë javëve në vijim do të organizohen aktivitete dhe takime të ngjashme me gazetarët në pesë qendrat e tjera rajonale të SHGM-së.