Здружението на новинари на Македонија на 19-ти февруари го одбележа својот јубилеј 70-години од своето основање.
Претседателот на ЗНМ, Насер Селмани во воведниот говор зборуваше за предизвиците и тешкотиите со кои се соочуваат новинарите во Македонија. Тој истакна дека за жал новинарството и медиумите низ годините поминувале секакви тешки моменти, и не секогаш било лесно да се заштитат правата на новинарите и слободата во медиумите. Тој истакна дека следењето на стандардите на Европска Унија и препораките на Советот на Европа се единствен пат за слобода на медиумите.
На присутните им се обрати и амбасадорката Sybille Suter Tejada од Швајцарската амбасада во Скопје и претставник на Швајцарската агенција за развој. Свое обраќање имаше и Амбасадорот Wouter Plomp, амбасадор на Холандска амбасада во Скопје, како и претставник на земјата членка која во моментов претседава со Советот на Европската Унија.
Како говорници дел зедоа и ветераните на македонското новинарство и тоа Ивко Панговски кој сведочел на формирањето на македонското новинарско здружување како и Мендух Ајдини кој во седумдесетите години бил Заменик претседател на ЗНМ.
Традиционално на настанот беше доделена новинарската награда „Крсте Петков Мисирков“ за животно дело на новинарот Атанас Костовски. Тој е новинар со искуство од педесет и осум години, познат поранешен уредник и коментатор на спортската редакцијата на МРТВ кој остави своевиден белег во развојот на спортското новинарство.
Новинарската награда „Јашар Еребара“ за едногодишно остварување за истражувачкото новинарство во медиуми ја освоија новинарките Менче Атанасова Точи, од НОВА ТВ и Светлана Дарудова, од весникот Дневник.
На настанот присуствуваа голем број на истакнати новинари, уредници, сопственици на медиуми, нашите соработници од партнерските организации и истакнати амбасадори.