ЗНМ ги алармира САД и ЕУ за законот за владино рекламирање 

Здружението на новинарите на Македонија, денеска испрати писмо на гаранторите на договорот  од Пржино, амбасадорите на САД и на Делегацијата на Европската унија во Скопје, Џес Бејли и Аиво Орав, во кое изразува загриженост за усвоениот предлог закон за владино рекламирање од Владата.

Во писмото се истакнува дека законот ги легализира и ги проширува сегашните коруптивни односи меѓу власта и медиумите. Со тоа, владата ќе ја засили контролата врз медиумите и ќе им го ограничи правото на информирање на граѓаните.

Објавените прислушувани разговори недвосмислено ја потврдија поврзаноста меѓу владините реклами и вмешувањето на претставниците на власта во работата на медиумите, се вели во писмото.

Кампањите немаат никаков јавен интерес, туку се политичка пропаганда на ВМРО-ДПМНЕ, преку кои во медиумите ја промовира сопствената идеолиогија и политичка програма. Самата министерка за Информатичко општество и администрација, Марта Томовска, на брифингот со претставниците на новинарите и медиумите потврди дека кампањите треба да и дадат можност на владата да се обрати на нејзиниот електорат.

ЗНМ ги потсетува амбасадорите дека место владини кампањи, ЗНМ се залага за субвенционирање на медиумите. Парите за кампањите да се користат за производство на медиумска содржина од јавен интерес, за зголемување на политички плурализам во медиумите, поддршка за малцинските медиуми, зајакнување на дописничката мрежа на медиумите, обука за новинарите и друго.