Vazhdon procesi i ngritjes së kapaciteteve të punonjësve mediatik në RTVM

Gjatë tre ditëve të fundit, një grup prej mbi 20 gazetarësh dhe kameramanësh nga programet e TVM dhe Radios Maqedonase morën pjesë në një trajnim treditor në Ohër për ngritjen e standardeve në raportim dhe punë, si dhe në betejën kundër dezinformatave.

Trajnuesit Ana Zafirova dhe Sefer Tahiri ndanë shembuj praktikë dhe këshilla të dobishme në drejtim të ngritjes së kapaciteteve të gazetarëve dhe punonjësve mediatik nga servisi publik, ndërsa në trajnim mori pjesë edhe kryetari i SHGM-së, Mlladen Çadikovski.

Përshtypjet nga trajnimi ndau gazetarja Sonja Rillkovska, e cila theksoi :  “Këto punëtori, trajnime, që SHGM i organizon nga viti i kaluar për punonjësit e TVM-së, janë jashtëzakonisht të rëndësishme për përmirësimin e njohurive dhe aftësive tona, për të krijuar përmbajtje më kualitative dhe kreative në servisin publik. Me këto ligjërata, ne si gazetarë i afrohemi trendeve të reja në raportimin gazetaresk”.

Trajnimi mbuloi tema aktuale nga sfera e jetës gazetareske, rrëfimi i historive, krijimi i një “storyboard” dhe një paragrafi përmes sekuencave, si të krijohen podkaste, u trajtua edhe tema e përgatitjes dhe zhvillimit të storjeje hulumtuese, por u fol edhe për ballafaqimin me dezinformatat. Në të njëjtën kohë, u trajtuan edhe tema specifike që kanë të bëjnë më konkretisht me punën e redaksive në kuadër të RTVM-së.

Në kuadër të nevojës për trajnime dhe rëndësisë së temave që trajtuan ligjëruesit, gazetarja Fitore Demolli në tre ditët e kaluara theksoi se: “Nga ky trajnim mësova shumë gjëra për gazetarinë, duke filluar nga qasje që duhet të jepet në një kronikë, nga efekti që duhet të ketë prezantimi i tij në publik, cilat janë kriteret që kërkohen në përmbajtjen e një informacioni për të qenë i plotë. Unë kam qenë e nderuar të jam pjesë e këtij trajnimi dhe mendoj se duhet të ketë më shumë ngjarje të tilla, sepse përfitojnë të gjithë pjesëmarrësit, kolegët gazetarë dhe punonjësit tjerë të medias”.

Pjesëmarrësit e trajnimit, gazetarët, kameramanët dhe redaktorët, me pjesëmarrjen e tyre aktive dhe kreative, i dhanë një shtysë shtesë të gjithë ngjarjes, dhe së bashku ranë dakord se ky format i ngjarjeve është jashtëzakonisht i rëndësishëm për forcimin e frymës gazetareske dhe pavarësisë së redaksive dhe se në periudhën e ardhshme ato do të vazhdojnë.

Me këtë lloj organizimi dhe me mbështetjen e SHGM-së, servisi publik në të ardhmen do të sigurojë vazhdimësi në procesin e ngritjes së standardeve dhe politikave gazetareske dhe editoriale.

Projekti për edukimin mediatik “Të rinjtë mendojnë”, në kuadër të të cilit u mbajt ky eveniment, është një projekt pesëvjeçar i financuar nga USAID dhe i implementuar nga IREX, dhe ky trajnim është pjesë e aktiviteteve që dalin nga memorandumi i nënshkruar i bashkëpunimit ndërmjet SHGM-së dhe RTVM-së .