U nënshkrua memorandum bashkëpunimi mes SHGM-së dhe Odës së Mjekësisë

Sot në ambientet e Shoqatës së Gazetarëve të Maqedonisë u nënshkrua memorandum bashkëpunimi mes SHGM-së dhe Odës së Mjekësisë me të cilin dy organizatat obligohen së bashku të punojnë në ngritjen e nivelit të bashkëpunimit ndërmjet dy profesioneve të cilat i përfaqësojnë dhe përmirësimit të kulturës shëndetësore në vendin tonë.

Të dyja organizatat në periudhën e kaluar konstatuan se ekziston nevoja për ngritjen e nivelit të bashkëpunimit dhe komunikimit ndërmjet gazetarëve dhe mjekëve duke organizuar ngjarje me interes të përbashkët në të cilat do të merrnin pjesë mjekët dhe gazetarët. Memorandumi nënkupton organizimin e aktiviteteve për përmirësimin e pozitës së mjekëve dhe punonjësve mediatik në situata krize, realizimin e aktiviteteve të përbashkëta që kanë për qëllim edukimin për ngritjen e cilësisë së raportimit mediatik lidhur me çështjet në fushën e shëndetësisë. Në kuadër të bashkëpunimit është paraparë edhe paraqitje e përbashkët para institucioneve kompetente dhe opinionit për miratimin e përshpejtuar të ndryshimeve në Kodin Penal, me të cilat sulmi ndaj punonjësit shëndetësor dhe gazetarit si dhe ndaj punonjësit mediatik do të konsiderohet sikur sulm ndaj një zyrtari.

“Ky memorandum dhe ky përkushtim për bashkëpunim të ndërsjellë është dëshmi se ne kemi një synim të sinqertë që gazetarët dhe mjekët të punojnë në pika të përbashkëta të interesit për të mirën e qytetarëve. Pikërisht këto do të jenë temat për të cilat do të obligohemi që të punojmë në të ardhmen, së pari përmes takimeve për konsultime ndërmjet anëtarëve të SHGM-së që trajtojnë tema nga sektori i shëndetësisë dhe përfaqësuesve të Odës së Mjekësisë. Në planin afatgjatë presim që ky bashkëpunim të kontribuojë në përmirësimin e komunikimit dhe besimit mes dy profesioneve”, theksoi kryetari i SHGM-së, Mlladen Çadikovski.

Kryetarja e Odës së Mjekësisë prof. Dr. Kalina Grivçeva Stardelova theksoi se mjekët dhe gazetarët janë të angazhuar në profesione publike dhe për këtë arsye ato shpeshherë ballafaqohen me probleme të ngjashme duke u përpjekur për t’i kryer detyrat e tyre në mënyrë profesionale.

“Kjo u bë veçanërisht e theksuar gjatë periudhës së pandemisë kur si gazetarët ashtu edhe mjekët u bënë viktima të sulmeve fizike dhe verbale. Me nënshkrimin e Memorandumit, ne si shoqata profesionale obligohemi që së bashku të arrijmë rezultate më të mira në përfaqësimin e anëtarëve tanë, t’i hapim rrugë komunikimit më të ngushtë në kryerjen e përditshme të detyrave të punës që do të mundësojnë shpërndarjen e informatave të sakta dhe në kohë për publikun, dhe duke kontribuar kështu për promovimin e kulturës shëndetësore dhe kujdesit shëndetësor në vend”, tha prof. Dr. Kalina Grivçeva Stardelova, kryetare e Odës së Mjekëve.