U mbajt Kuvendi vjetor jozgjedhor i SHGM-së
Shoqata e Gazetarëve të Maqedonisë (SHGM) të shtunën më 7 maj mbajti Kuvendin vjetor jozgjedhor, në të cilin morën pjesë anëtarë të rregullt të shoqatës.
Fjalim hyrës kishte kryetari i SHGM-së, Mlladen Çadikovski, i cili theksoi se përkundër kushteve të vështira pandemike në vitin 2021, Shoqata arriti të sigurojë mbështetje për realizimin e disa projekteve, trajnimeve, ngjarjeve dhe takimeve në të cilët morën pjesë mbi 400 pjesëmarrës.
“2021 ishte një vit sfidash. Në kushte të vështira të punës dhe krizë shëndetësore e shkaktuar nga pandemia me virusin Covid-19 në mbarë botën, por edhe tek nesh këtu, në vendin tonë, SHGM arriti të zbatojë angazhimet dhe qëllimet e caktuara në Planin Strategjik të vitit 2019, dhe të vazhdojë të punojë për zbatimin e tij”, tha Çadikovski.
Çadikovski theksoi aktivitetet e seksioneve të SHGM-së, përpjekjet për ndryshimin e Kodit Penal i cili është ende në procedurë parlamentare, përpjekjet e SHGM-së për uljen e mosndëshkimit të autorëve të sulmeve ndaj gazetarëve dhe shkeljen e të drejtave të tyre: “Në vitin 2021, në kuadër të SHGM-së në mënyrë aktive punuan seksionet e gazetarëve, veçanërisht seksioni i kameramanëve, i cili gjatë vitit të kaluar realizoi disa takime rajonale kushtuar përmirësimit të bashkëpunimit të ndërsjellë dhe funksionimit solidar. Një hap tjetër pozitiv që është i rëndësishëm për shoqatën në planin afatgjatë është formimi i Seksionit të Gazetarëve të Rinj në SHGM. Anëtarët e këtij seksioni tashmë janë duke punuar në mënyrë aktive në planin e tyre strategjik për veprim në të ardhmen. Si rezultat i kërkesave të vazhdueshme të SHGM-së, Qeveria e Maqedonisë së Veriut pranoi ndryshimet e propozuara në Kodin Penal, të cilat janë në përputhje me rekomandimet e Këshillit të Evropës, me qëllim të krijimit të një sistemi më efektiv për mbrojtjen e gazetarëve, duke dekurajuar sulmuesit e mundshëm në të ardhmen”.
Sashka Cvetkovska, e cila është koordinatore e Seksionit të Gazetarëve të Rinj, për mundësitë dhe potencialet e kolegëve të rinj tha: “Përdorimi i të rinjve në prodhimin e produkteve gazetareske është një gjë, por mundësia më e madhe për të nxitur ndryshime përmes gazetarisë sot qëndron në ndërlidhjen globale: të përgatitet brezi i ardhshëm i qytetarëve të botës që do të kenë aftësitë, mirëkuptimin dhe guximin për të zgjidhur problemet globale të sotme në kohën e tyre. Që kjo të ndodhë, duhet të ketë një përfshirje më të madhe të të rinjve në redaksitë, por është veçanërisht e rëndësishme t’u jepen aftësitë kryesore dhe t’u sigurohet një mjedis pune në të cilin ata do të mund të zhvillohen”.
Gjatë kuvendit u diskutuan disa tema të rëndësishme, ndër të cilat ishte edhe ndryshimi i rregulloreve dhe Statutit të SHGM-së për përfshirjen e përfaqësuesve nga qendrat rajonale të SHGM-së në Bordin Drejtues e SHGM-së, përcaktimin e qëllimeve të Seksionit të Gazetarëve të Rinj në SHGM dhe u debatua për kushtet e vështira ekonomike në të cilat ndodhen mediat, edhe atë kryesisht mediat rajonale dhe lokale. Drejtori ekzekutiv i SHGM-së, Dragan Sekulovski iu referua raportit narrativ për vitin 2021, gjegjësisht realizimit të aktiviteteve për vitin e kaluar, ku u përfshi edhe raporti financiar dhe auditor i Shoqatës.
Në këtë ngjarje, Milan Spirovski, hulumtues i projektit rajonal në SHGM, prezantoi raportin “Treguesit e lirisë së shprehjes dhe pavarësisë së mediave në Maqedoni për vitin 2021”, në të cilin janë të elaboruara trendët e reja në gjendjen e lirisë së mediave dhe sigurisë së gazetarëve dhe zbatimin e legjislacionit ekzistues kombëtar në lidhje me median në vend.
