Thirrje për ndërprerjen e dhunës kundër gazetarëve

Gazetarët edhe njëherë ngritën zërin kundër persekutimit  të tyre nga pushteti. Këtë thirrje nga Velesi e bënë anëtarët e Shoqatës së gazetarëve të Maqedonisë, të cilët të shtunën morrën pjesë në punën e Kuvendit të dytë të rregulltë vjetor të SHGM. Në deklaratën e miratuar, gazetarët kërkojnë të ndërpritet përndjekja e kolegëve të tyre dhe të lirohet gazetari Zoran Bozhinovski.

E patolerueshme është që gazetarët të trajtohen si dëm kolateral dhe t’i nënshtrohen presioneve të ndryshme, thuhet në deklaratën e miratuar të Kuvendit.

Përveç kësaj, ata dënuan edhe të gjitha përpjekjet për rregullimin me ligj të portaleve. Sipas tyre, kjo kërkesë ka për qëllim të shpërqëndrojë debatin për shkaqet e vërteta të mungesës së lirisë së mediave në Maqedoni. Portalet i kanë të gjitha të drejtat dhe detyrimet ligjore sikurse edhe mediat tjera tradicionale”, thuhet në deklaratë.

Kuvendi i SHGM kundërshton edhe idenë për regullimin me ligj të përmbajtjeve mediatike. Gazetarët vlerësojnë se etika profesionale mund të jetë objekt i vetrregullimit  të gazetarëve dhe mediave, e jo edhe të politikës.

Ato  ftuan edhe për reformimin e servisit publik radioviziv, Radiotelevizonit të Maqedonisë, i cili duhet të ketë autonomi institucionale dhe politikë të pavarur redaktuese. “Ky qëllim arrihet vetëm përmes departizimit dhe profesionalizimit të organeve drejtuese të RTM dhe nëse sigurohet burim i sigurt dhe i qëndrueshëm finansimi”, vlerësojnë gazetarët.

Përndryshe, në Kuvendin e rregullt vjetor, drejtuesit e SHGM paraqitën raport për punën njëvjeçare të Shoqatës si dhe raport finansiar. Pas një debati konstruktiv, anëtatrët e Kuvendit miratuan të dy raportet, me disa sugjerime që kontribuojnë për përmirësimin e punës së SHGM në të ardhmen.

22 Prill, 2017

Shkup

Shoqata e gazetarëve të Maqedonisë