SHGM, SPGPM, KEMM DHE IMM kërkojnë reagim urgjent të Ministrisë së Punëve të Brendshme dhe Prokurorisë Publike pas thirrjeve të vazhdueshme për linçim të gazetarëve dhe punonjësve të tjerë të “Fondacionit Metamorfozis” që në mënyrë të organizuar përhapen nga grupe dhe individë në rrjetet sociale, duke cenuar kështu sigurinë e kolegëve tanë. 

Përkujtojmë se në nëntor dhe dhjetor të vitit të kaluar “Fondacioni Metamorfozis” ka paraqitur kërcënimet në Ministrinë e Punëve të Brendshme, ndërsa atëherë reaguan edhe organizatat gazetareske, duke kërkuar një qasje proaktive nga MPB dhe Prokuroria Publike. Gjithashtu, përkujtojmë se që nga atëherë nuk janë marrë masa për të parandaluar dhe sanksionuar këto kërcënime, por përkundrazi ato vazhdojnë, dhe politika e mosndëshkimit mbetet e pranishme. 

Është e papranueshme për institucionet kompetente, Ministrinë e Punëve të Brendshme dhe Prokuroria Publike, për muaj me radhë të shmangin përgjegjësinë për të reaguar ndaj kërcënimeve të hapura kundër gazetarëve, të cilëve u zbulohen të dhënat personale në mënyrë që i ekspozon ata ndaj rrezikut për të qenë cak i sulmeve fizike. 

Në të njëjtën kohë, i përkujtojmë institucionet se efikasiteti në luftën kundër kërcënimeve në rrjetet sociale nuk përfundon me gjetjen e kërcënuesve të zyrtarëve të lartë të qeverisë, gjë që është praktikë kur bëhet fjalë për bartësit e funksioneve publike. Nga institucionet presim të mos kenë standarde të dyfishta kur bëhet fjalë për gazetarët dhe punonjës mediatik, veçanërisht kur ata janë të ekspozuar ndaj gjuhës së urrejtjes dhe thirrjeve për linç vetëm për shkak të kryerjes së profesionit të tyre.