Takim rajonal i SHGM-së dhe SPGPM-së me gazetarë dhe punonjës mediatik nga Kumanova

Në kuadër të aktiviteteve rajonale, përfaqësues të SHGM-së dhe SPGPM-së mbajtën një takim pune me gazetarë dhe punonjës mediatik nga rajoni i Kumanovës. Me praninë e më shumë se 15 përfaqësuesve, gjatë takimit u bisedua për shumë tema që prekin korrespondentët, statusin e tyre dhe kushtet në të cilat ata punojnë, ndërsa u ndanë edhe përvojat dhe sfidat me të cilat përballen gazetarët në punën e përditshme.  

Kryetari i SHGM-së, Mlladen Çadikovski në fjalimin e tij theksoi: “SHGM në kulmin e pandemisë vitin e kaluar ndihmonte në interes të sigurisë dhe shëndetit të gazetarëve dhe punonjësve mediatik duke iu siguruar pajisje mbrojtëse, teste antigjenesh, vaksinime. SHGM dhe SPGPM morën pjesë dhe ishin një partner konstruktiv në miratimin e masave qeveritare në interes të gazetarëve dhe punonjësve mediatik, si dhe në procesin e rritjes së pagave në RTVM dhe MIA, fondit për media dhe përgatitjen e protokolleve të sigurisë”, tha ai.  

Nga ana e kolegëve nga Kumanova u theksua se aktualisht problemi themelor është i natyrës ekzistenciale, i cili reflektohet në numrin e mediave, përkatësisht numrin e gazetarëve. 

Në takimin në Kumanovë, u theksuan disa probleme aktuale, si dhe problemi me rrjetin e korrespondentëve të RTVM-së, gazetarët kanë kontrata mujore, edhe pse RTVM premtoi se ky problem do të zgjidhet. Në këtë moment nuk janë regjistruar incidente serioze dhe nuk ka padi aktuale kundër gazetarëve. Si koordinator në rajonin e Kumanovës, kolegët e pranishëm njëzëri votuan dhe zgjodhën Nexhat Aqifin, i cili edhe deri më tani kishte një marrëdhënie korrekte dhe shumë profesionale me Shoqatën e Gazetarëve të Maqedonisë në interes të bashkëpunimit të ndërsjellë dhe procesit të përmirësimit të kushteve, drejtave dhe sigurisë së gazetarëve dhe punonjësve mediatik nga Kumanova.

Ai në fjalimin e tij para të pranishmëve theksoi rëndësinë e takimeve të tilla të punës dhe tha: “Takimet e këtij lloji mes gazetarëve dhe punonjësve mediatik dhe përfaqësuesit e SHGM-së jo vetëm në këtë rajon por në tërë vendin janë shumë të dobishme dhe të nevojshme në mënyrë që të munden të ndahen sfidat dhe problemet me të cilat përballen gazetarët dhe punonjësit mediatik në bazë ditore. Përmes takimeve të shpeshta, SHGM do të ketë koordinim dhe solidaritet më të madh në zgjidhjen e problemeve në nivel lokal dhe kombëtar,” tha Aqifi.