Takim i SPGPM-së dhe SHGM-së me Presidentin Stevo Pendarovski

Përfaqësues të Sindikatës së Pavarur të Gazetarëve dhe Punonjësve Mediatik (SPGPM) dhe të Shoqatës së Gazetarëve të Maqedonisë (SHGM) të mërkurën (23.11.2022) u pranuan në takim nga Presidenti i Republikës së Maqedonisë së Veriut, Stevo Pendarovski.

Gjatë takimit u bisedua për gjendjen në sektorin mediatik në Maqedoni, për kushtet e punës së gazetarëve dhe punonjësve mediatikë, si dhe për ligjet që rregullojnë punën në këtë fushë. Një nga pikat kryesore të takimit ishte fshirja e ndalimit aktiv për reklamimin e qeverisë në mediat private, gjegjësisht ndryshimet dhe plotësimet në Ligjin për shërbimet mediatike audio dhe audiovizuele (LShMAA), të cilat janë në procedurë parlamentare.

Si organizata gazetareske, SPGPM dhe SHGM përsëritën qëndrimin e tyre parimor kur bëhet fjalë për fushatat e paguara me para të qytetarëve në mediat private, përkatësisht se përvoja e mëparshme ka dëshmuar se kjo praktikë do mund të ketë një efekt katastrofik, si në gazetari ashtu edhe në tregun mediatik.

“Me përsëritjen e këtij gabimi, Maqedonia po kthehet prapa në gjendjen sikur para dhjetë vitesh kur në mënyrë të ngjashme u korruptonin drejtpërdrejt mediat dhe u cenonte pavarësia editoriale dhe gazetareske e tyre”, theksuan SPGPM dhe SHGM gjatë takimit.

SPGPM dhe SHGM theksuan gjithashtu se miratimi i ndryshimeve të tilla pa përfshirjen e të gjithë aktorëve në sektorin mediatik dhe pa debat publik është një praktikë jodemokratike dhe jotransparente dhe se në këtë mënyrë nuk krijohen zgjidhje të cilët do të garantojnë pavarësinë e mediave dhe lirinë e shprehjes.