SPGPM dhe SHGM: Largimi i gazetarëve nga puna nuk duhet të jetë masa e parë për menaxhimin e krizës
Sindikata e Pavarur e Gazetarëve dhe Punonjësve Mediatik (SPGPM) dhe Shoqata e Gazetarëve të Maqedonisë (SHGM) dënojnë me forcë vendimin e punëdhënësit “Net Media Group”, i cili zotëron internet portalet “Lokalno” dhe “Standard”, për të lëshuar nga puna të paktën pesë gazetarë, një pjesë e të cilëve kanë pasur marrëveshje pune me afat të caktuar dhe ndërsa të tjerët me marrëveshje për honorarë.
Edhe pse këtë hap e arsyetojnë me krizën e shkaktuar nga koronavirusi, largimi i gazetarëve nga puna duhet të jetë masa e fundit, duke pasur parasysh rolin e rëndësishëm të mediave në kushte të gjendjes së jashtëzakonshme.
Veprimi i tillë është veçanërisht për t’u habitur sepse qeveria njoftoi një sërë masash për mediat, dhe shfrytëzimi i masave është i kushtëzuar me moslargimin nga puna të gazetarëve dhe punonjësve mediatik përderisa zgjasin masat dhe gjendja e jashtëzakonshme.
SPGPM dhe SHGM i bëjnë thirrje punëdhënësit që të rishqyrtojë këtë vendim i cili në shikim të parë duket se është i nxituar, pasi sipas masave të qeverisë ai së paku mund të ofrojë paga minimale. Në të njëjtën kohë, ne konsiderojmë se praktika ku pronarët kërkojnë nga gazetarët dhe punonjësit mediatik që kanë marrëveshje të vlefshme për të nënshkruar vullnetarisht ndërprerje të marrëveshjeve është e papranueshme dhe e palejueshme. Kjo u sjell dëme të drejtpërdrejta punëtorëve dhe ne sugjerojmë që ofertat e tilla duhet menjëherë të refuzohen.
Largimet nga puna vijnë pa paralajmërim ose njoftim paraprak për situatën financiare të pronarëve, duke lënë përshtypjen se pronarët as nuk kanë pritur e as nuk shpresojnë që qeveria do të sjell masa të tjera për të lehtësuar ndikimin e krizës në operacionet financiare.
Ky shembull ndikon keq në imazhin e përgjithshëm dhe tregon se mediat dhe gazetarët janë të parët që preken nga kriza ekonomike. SPGPM dhe SHGM kanë frikë se kjo çështje mund të shkaktojë “efekt domino” dhe t’i inkurajojnë negativisht mediat e tjera që të ndërmarrin masa të tilla.
