Si të reagohet nën presion: kameramanë dhe punonjës mediatikë në trajnim në Veles

Më 27 dhe 28 mars 2026, në Veles, Shoqata e Gazetarëve të Maqedonisë, në kuadër të Akademisë Trajnuese për Gazetarë dhe Punonjës të Medias (T-AJM), organizoi një trajnim dyditor për sigurinë fizike, të dedikuar për kameramanë dhe profesionistë të tjerë mediatikë.

Trajnimi ishte konceptuar si një ndërthurje e sesioneve teorike, diskutimeve dhe punës praktike, me fokus në rreziqet reale me të cilat përballen punonjësit e medias në terren. Pjesëmarrësit punuan në tema që lidhen me forma të ndryshme të presioneve ndaj punonjësve mediatikë, identifikimin e situatave me rrezik të lartë, sfidat e sigurisë specifike gjinore, si dhe kornizën ligjore dhe institucionale për mbrojtjen e punonjësve mediatikë.

Theks i veçantë u vu në simulimet dhe ushtrimet praktike. Në njërën prej tyre, pjesëmarrësit punuan në një skenar për raportim nga një aksident trafiku ku ishte përfshirë një figurë publike, ku ushtruan vlerësimin e rrezikut, reagimin nën presion dhe marrjen e vendimeve në një situatë të ndjeshme dhe të tensionuar. Në një pjesë tjetër të programit, përmes punës praktike, ata u njohën me përdorimin e pajisjeve mbrojtëse, trajtimin e duhur të jelekut antiplumb dhe helmetës, si dhe përgatitjen e pajisjeve të nevojshme për punë në një mjedis krize.

Dita e dytë iu kushtua gjithashtu përgatitjes për raportim nga protesta të dhunshme dhe ngjarje të tjera me rrezik të shtuar, ku u punua në vlerësimin e kushteve në terren, përzgjedhjen e rrugëve të sigurta për lëvizje dhe logjistikën bazë për punë në mjedise të rrezikshme. Ushtrimi praktik për mbrojtje dhe ndihmë në terren u mundësoi pjesëmarrësve të lidhin informacionet nga modulet me situata konkrete që mund t’i hasin në punën e përditshme.

Trajnimi ishte i dedikuar për kameramanë dhe punonjës të tjerë mediatikë, ndërsa qasja ishte e përshtatur si për pjesëmarrës me më pak përvojë, ashtu edhe për ata që kanë përvojë shumëvjeçare në terren.

Trajnerë ishin Zoran Riçliev dhe Kristina Atovska, të cilët përmes punës me shembuj realë, skenarë dhe ndërveprim me pjesëmarrësit hapën çështje të rëndësishme për sigurinë personale, përgatitjen para daljes në terren dhe sjelljen në kushte me rrezik të shtuar.

Trajnimi u realizua me mbështetje financiare të Bashkimit Evropian, në kuadër të projektit “Akademia Trajnuese për Gazetarë dhe Punonjës të Medias – T-AJM”. Përmbajtja është përgjegjësi ekskluzive e Shoqatës së Gazetarëve të Maqedonisë dhe nuk pasqyron domosdoshmërisht qëndrimet e Bashkimit Evropian.