Shoqatat e Gazetarëve të Maqedonisë dhe Kosovës me iniciativë të përbashkët për bashkëpunim

Përfaqësuesit e Shoqatës së Gazetarëve të Maqedonisë (SHGM) dhe Asociacionit të Gazetarëve të Kosovës (AGK) më 27 maj 2022 zhvilluan takim pune për të diskutuar gjendjen e gazetarëve dhe mediave në të dyja vendet.

Dragan Sekulovski, drejtor Ekzekutiv i SHGM-së para njëzet kolegëve dhe kolegeve të mediave të ndryshme në Kosovë i prezantoi projektet dhe përpjekjet aktuale të SHGM-së për përmirësimin e solidaritetit në komunitetin gazetaresk dhe mbrojtjen e të drejtave të gazetarëve në Maqedoni kur ata janë në rrezik. “Njëra nga format e përmirësimit të bashkëpunimit mes gazetarëve por edhe avancimit të njohurive të tyre është edhe përmes aktiviteteve të seksioneve tematike të SHGM-së në Shkup dhe qytete tjera”, theksoi Sekulovski.

Xhemail Rexha, kryetar i Këshillit të Asociacionit të Gazetarëve të Kosovës, ka folur për gjendjen me të drejtat e gazetarëve si dhe sfidat që i kanë mediat në kontekstin e tyre lokal. Ai theksoi se vizita të tilla bashkëpunuese në vendet fqinje dhe shkëmbimi i përvojave dhe njohurive kanë ndikim pozitiv në komunikimin dhe bashkëpunimin e ardhshëm mes gazetarëve në të gjithë rajonin.

Në këtë takim pune u bisedua për mundësinë e organizimit të vizitave të ngjashme studimore të gazetarëve në vendet e Ballkanit Perëndimor për tema që do të jenë me interes për gazetarët, por veçanërisht me qëllim të përmirësimit të përbashkët të standardeve profesionale, duke shkëmbyer informacione për shembuj të suksesshëm të punës së gazetarëve dhe mediave. Të pranishmit debatuan mbi sfidat e dezinformimeve në rajon, sigurinë e gazetarëve dhe për modelet e financimit të mediave.

Kjo vizitë e kolegëve nga Kosova është pjesë e aktiviteteve të AGK-së në bashkëpunim me Akademinë për Integritet Informativ të Gazetarëve dhe parasheh një vizitë të një grupi gazetarësh të rinj në disa organizata mediatike dhe media në Shkup.