SHGM: Takim i grupit të punën për krijimin e Protokollit për parandalimin e shkeljes së të drejtave të gazetareve
Me iniciativë të SHGM-së u realizua takim i grupit të punës i cili do të krijojë një Protokoll për parandalimin e shkeljes së të drejtave të gazetarëve (veçanërisht të grave gazetare) përmes internetit, i zhvilluar përmes një procesi të përfshirjes dhe konsultimeve me përfaqësues të mediave/gazetarëve dhe punonjësve mediatik, përfaqësues të institucioneve relevante qeveritare dhe komunitetit akademik. Grupi punues përbëhet nga anëtarë të SHGM-së, një anëtar i Ministrisë së Punëve të Brendshme, nga Fakulteti Juridik dhe i Sigurisë në Shkup dhe ekspertë të tjerë relevantë për hartimin e Protokollit.
Sipas të dhënave nga Regjistri i sulmeve që e mban SHGM-ja, në dy vitet e fundit janë regjistruar 19 sulme ndaj gazetarëve dhe punonjësve mediatik, prej të cilave 11 janë regjistruar si sulme ndaj grave gazetare. Megjithatë, është shqetësuese tendenca në rritje ku gazetaret janë objektiv i kërcënimeve dhe sulmeve online.
Protokolli do të synojë krijimin e një mekanizmi funksional për siguri më të madhe dhe parandalimin e shkeljeve të të drejtave të gazetarëve (veçanërisht të grave gazetare) përmes internetit dhe së bashku me ndryshimet dhe plotësimet në Kodin Penal do të kontribuojë në afirmimin dhe sensibilizimin e mëtejshëm të zyrtarëve për çështjen e sigurisë së gazetareve në hapësirën online në vend. Nga anëtarët e grupit të punës u pranua që sipas ekspertizës së tyre çdo anëtar do të bëjë një analizë të shkurtër në kontekst të ndërtimit dhe formimit të strukturës së dokumentit përfundimtar – Protokollit që do të finalizohet më së voni deri në gusht të vitit 2022.
Në takim u përcaktuan orientimet fillestare, si dhe hapat dhe dinamika e punës në përputhje me afatet për përgatitjen e draft analizave. Anëtarët e grupit të punës theksuan se në periudhën në vijim do të konsultohen me palët e interesuara, studentë të drejtësisë dhe sigurisë, me personat përgjegjës për marrëdhëniet me publikun në MPB, me gazetaret që kanë qenë shënjestër e sulmeve apo kërcënimeve, me çka do të fitohet një pasqyrë më e qartë në kontekstin e hulumtimit dhe të dhëna për analiza të mëtejshme që do të jenë pjesë përbërëse e Protokollit për sigurinë e grave gazetare në hapësirën online, që do të nënshkruhet nga SHGM-ja dhe MPB-ja gjatë këtij viti.
Ngjarja është në kuadër të projektit “Sindikatat për rimëkëmbje të drejtë”, financuar nga Bashkimi Evropian përmes Konfederatës Evropiane së Sindikatave dhe Federatës Evropiane të Gazetarëve.
