SHGM: Sulmohen me sëpatë një gazetar dhe një kameraman, kërkojmë reagim të menjëhershëm nga MPB
Shoqata e Gazetarëve të Maqedonisë (SHGM) kërkon nga Ministria e Punëve të Brendshme (MPB) që të bëjë një hetim të shpejtë dhe efikas për sulmin e sotëm ndaj kolegëve tanë nga TV Pollogu, nga Tetova.
Gjegjësisht, sot gjatë xhirimit të inserteve për kronikën nga Shkolla Fillore “Naim Frashëri” në fshatin Gjurgjevishtë, komuna Vrapçisht në afërsi të Gostivarit, rreth orës 14:00 gazetari Nevri Ademi dhe kameramani Zbulim Maksuti janë sulmuar së pari në mënyrë verbale dhe më pas edhe fizikisht nga ana e një personit.
Sipas deklaratave të kolegëve tanë, për nevoja të kronikës për zbatimin e projekteve në këtë shkollë, derisa ekipi gazetaresk ka qenë duke filmuar objektin shkollor, Burhan Hamiti u është drejtuar atyre me ofendime dhe kërcënime verbale, ka kapur gazetarin për kokë dhe e ka shtyrë nëpër shkallët e shkollës.
SHGM kontaktoi menjëherë me gazetarin e TV Pollogut, Nevri Ademi dhe ai e konfirmoi këtë incident dhe na shpjegoi tërë ngjarjen: “Përderisa ishim duke filmuar dhe duke punuar për kronikën së bashku me kolegun kameraman Zbulim Maksuti, personi Burhan Hamiti na u afroi dhe pasi që na ofendoi me fjalë fyese, më kapi për kokën dhe më shtyu nëpër shkallët. Pastaj zbriti në oborrin e shkollës dhe filloi të na ndiqte me sëpatë në dorë. Ne me shpejtësi hipëm në veturë dhe u drejtuam në stacionin policor që të paraqesim sulmin, ndërsa sulmuesi gjatë tërë kohës na ndiqte me veturën e tij deri në fshatin Negotinë, të Gostivarit”, deklaroi Ademi.
SHGM kërkon nga Ministria e Punëve të Brendshme që të bëjë një hetim të shpejtë dhe efikas në drejtim të gjetjes dhe sanksionimit të sulmuesit. Theksojmë se kërcënimet me jetë paraqesin vepra penale sipas Kodit Penal dhe Ministria e Punëve të Brendshme dhe Prokuroria Publike duhet urgjentisht të hetojnë, ndjekin penalisht dhe t’i dënojnë ata të cilët shkelin ligjin, por edhe të parandalojnë krime të tilla të mundshme në të ardhmen.
