SHGM, SPGPM dhe KEMM kërkuan nga qeveria kushte më të mira të punës për kameramanët dhe fotoreporterët gjatë mbulimit të ngjarjeve
Me iniciativë të përfaqësuesve të seksionit të kameramanëve të SHGM-së dhe fotoreporterëve, sot u mbajt një takim me Sekretarin e Përgjithshëm të Qeverisë, z. Muhamed Zeqiri, në të cilin morën pjesë edhe përfaqësues të Shoqatës së Gazetarëve të Maqedonisë (SHGM), Sindikatë të Pavarur të Gazetarëve dhe Punonjësve Mediatik (SPGPM) dhe Këshillit për Etikë në Mediat në Maqedoni (KEMM).
Të nxitur nga incidentet e fundit gjatë vizitës së delegacionit bullgar në Qeveri, ku punonjësit mediatik nuk kishin kushte adekuate për punë, në takimin u diskutuan dhe u prezantuan problemet dhe sfidat me të cilat përballen kameramanët dhe fotoreporterët në ngjarjet e organizuara nga Qeveria. Kameramanët dhe fotoreporterët theksuan se duhet gjetur një zgjidhje serioze në kuadër të respektimit të protokolleve shëndetësore për mbulimin mediatik të ngjarjeve që organizohen në ambiente të mbyllura.
Duke marr parasysh se problemet me kushtet e raportimit nuk janë të izoluara, u kërkua që të bëhet një protokoll apo rregullore e posaçme përmes së cilës ekipet gazetareske maqedonase nuk do të diskriminohen në të ardhmen në kurriz të gazetarëve të huaj apo përfaqësuesve të shërbimeve të PR-it të qeverisë. Qeveria në të ardhmen kur do të organizojë ngjarje të tilla për mediat do të duhet të sigurojë kushte adekuate për punën e tyre.
U theksua se duhet të gjitha informacionet që publikohen nga qeveria dhe institucionet publike, qoftë në formë teksti, fotografie apo video materiali, të shënohen qartë si material qeveritar me filigran. Në këtë mënyrë, publiku nga njëra anë do të ndërgjegjësohet dhe do të dallojë se çfarë informacioni është publikuar nga qeveria dhe çfarë nga ana e mediave, dhe nga ana tjetër mediat nuk do të kopjojnë aq lehtë informacione që nuk janë të tyre.
Gjatë takimit u ra dakord që në periudhën e ardhshme të mbahet edhe një takim tjetër ku do të saktësohen konkluzionet dhe do të zbatohen propozimet konstruktive në formë të protokolleve për të shmangur situata të tilla të pakëndshme në të ardhmen. Këto aktivitete kanë për qëllim të përmirësojnë kushtet e punës së punonjësve mediatik, që në fund duhet të kontribuojë për një raportim më të lirë dhe më profesional.
