SHGM, SPGM dhe KEMM në takim me Ministrin Filipçe: Nuk ka ndalesë për filmim, gazetarët duhet të vazhdojnë punën e tyre pa pengesa
Incidentet me pengimin e gazetarëve në ambientin e jashtëm të rrethin e “8 Shtatorit” janë duke u hetuar, dhe nuk ka vendim për të ndaluar punën e ekipeve të gazetarëve në ambientet e jashtme të institucioneve të shëndetit publik.
Sot, me kërkesë të ministrit të Shëndetësisë Venko Filipçe, u zhvillua takim me përfaqësuesit e Shoqatës së Gazetarëve të Maqedonisë (SHGM), Sindikatës së Pavarur të Gazetarëve dhe Punonjësve Mediatik (SPGM) dhe Këshillit për Etikë në Media të Maqedonisë (KEMM), me rastin e reagimit të djeshëm të SHGM-së dhe SPGM në lidhje me pengimin e punës së gazetarëve në rrethin e ambienteve të SPQ “8 Shtatori” në Shkup.
Në takim, ministri Filipçe theksoi se nuk ka vendim nga Ministria e Shëndetësisë për të penguar punën e gazetarëve, kameramanëve dhe fotoreporterëve në asnjë institucion shëndetësor publik në Republikën e Maqedonisë së Veriut.
Në këtë drejtim, Ministri shtoi: “Incidenti i ndodhur ditët e kaluara në “8 Shtator” që nuk iu lejua një grup gazetarësh të raportonin para hyrjes dhe në parkingun e këtij spitali është i izoluar dhe për të njëjtin po merren masa për të për të zbardhur rastin dhe për përgjegjësinë e personave që penguan drejtpërdrejt punën e ekipeve gazetareske”.
Përfaqësuesit e organizatave të gazetarëve e mirëpritën vendimin e ministrit Filipce për të ndërmarrë veprime në të ardhmen për të zgjidhur këtë rast dhe shtuan se vetëm përmes një aktiviteti të përbashkët dhe të koordinuar midis Ministrisë dhe gazetarëve profesionistë do të kemi garanci për informacione të sakta dhe me kohë në lidhje me pandeminë në vend.
Në takimin e sotëm midis ministrit dhe organizatave të gazetarëve u tejkalua keqkuptimi i mëparshëm lidhur me atë nëse ka ndonjë vendim zyrtar që mund të kufizojë hapësirën publike ku gazetarët punojnë para institucioneve shëndetësore publike.
Ministri theksoi se ekipet e gazetarëve mund dhe duhet të filmojnë pa probleme në të gjitha hapësirat publike para ambienteve të spitaleve në mënyrë që të raportojnë profesionalisht në lidhje me pandeminë.
Përfaqësuesit e SHGM-së, SPGM-së dhe KEMM edhe njëherë theksuan se gazetarët në raportimin e tyre duhet t’u përmbahen standardeve etike, duke respektuar privatësinë e pacientëve ose të afërmve të tyre, në përputhje me interesin publik.
Përveç kësaj, pjesëmarrësit ranë dakord se është e nevojshme të vazhdohet komunikimi në të ardhmen në mënyrë që të parandalohen situata të ngjashme, që mund të ndikojnë negativisht në punën e gazetarëve, por edhe të institucioneve shëndetësore dhe personelit mjekësor.
