SHGM realizoi takim me zëvendës kryeministren Gërkovska
Javën e kaluar, Shoqata e Gazetarëve të Maqedonisë mbajti takim me zëvendës kryeministren për Politika për Qeverisje të Mirë në Qeverinë e RMV – së Sllavica Gërkovska, ku u bisedua për intensifikimin e bashkëpunimit të ndërsjellë, veçanërisht në fushën e përmirësimit të transparencën e institucioneve.
Kjo është veçanërisht e rëndësishme duke pasur parasysh faktin se gazetarët dhe institucionet janë përgjegjës para publikut për punën e tyre. Në mënyrë që gazetarët të mund ta kryejnë punën e tyre në mënyrë profesionale, është e nevojshme që institucionet të bashkëpunojnë me ta për të marrë informacione të shpejta dhe me kohë, të cilat eventualisht do t’u përcillen qytetarëve.
Sipas informatave me të cilat disponon Shoqata e Gazetarëve të Maqedonisë, problemi më i madh me të cilin ballafaqohen kolegët gazetarë është transparenca e pamjaftueshme në nivel lokal, por praktika është e ngjashme edhe në institucionet e tjera që janë pjesë e pushtetit qendror.
Krijimi i një regjistri publik me paralajmërime për zyrtarët që kanë shkelur kodin e etikës, praktika e informimit të rregullt mujor të gazetarëve, janë aktivitete specifike që mund të jenë të dobishme për punën e mediave, theksoi Dragan Sekullovski, drejtor i SHGM – së.
Ndër të tjera, një nga pikat e diskutuara është organizimi i një ngjarjeje publike në shtator ku do të ketë përfaqësues nga të dyja palët, ku do të evidentohen problemet me mostransparencën e komunave dhe institucioneve të caktuara dhe do të diskutohen planet për përmirësimet e mundshme.
