SHGM reagon ndaj procedurës së qytetit të Shkupit: reklamimi me para publike është i ndaluar
Shoqata e Gazetarëve të Maqedonisë (SHGM) alarmon për procedurën e qytetit të Shkupit, i cili përmes prokurimit publik planifikon të investojë mjetet e qytetarëve për fushata në televizione private dhe media online për promovimin e aktiviteteve të qytetit.
Sipas njoftimit për prokurim publik, i disponueshëm në sistemin elektronik për prokurim publik, qyteti i Shkupit planifikon të investojë gati 5 milionë denarë për “Përgatitjen dhe realizimin e fushatave promovuese për projekte të veçanta për aktivitetet e qytetit të Shkupit” përmes një agjenci marketingu. Theksojmë se me këtë mënyrë të financimit të mediave, qyteti i Shkupit shkel moratoriumin për ndalimin e fushatave publike në media private dhe në mënyrë të drejtpërdrejtë shkel nenin 102 të Ligjit për shërbime mediatike audio dhe audiovizuele për ndalimin e reklamimit, si dhe vendimin e Qeverisë për ndalimin e reklamimit në mediat tradicionale dhe online nga viti 2017.
Praktika e pagesës së fushatave publike me paratë e qytetarëve, përveç se është e paligjshme, mund të nxisë edhe njësitë e tjera të vetëqeverisjes lokale për ta zbatuar atë, gjë që do të prishte më tej tregun e brishtë mediatik dhe do të kërcënonte pavarësinë e mediave duke mbështetur “mediat miqësore” dhe duke injoruar ato që raportojnë në mënyrë kritike.
Kujtojmë se fushatat publike të paguara shtrenjtë përmes të cilave do të blihej hapësira në mënyrë selektive nga ana e Qeverisë dhe autoritetet lokale nuk është një mënyrë e mirë për të mbështetur mediat, por në të kundërt, mund të shndërrohet në një përpjekje për t’i korruptuar ato dhe në të njëjtën kohë për të promovuar agjenda politike-partiake që nuk janë me interes publik. Prandaj SHGM më shumë se dy vitesh insiston në krijimin e një Fondi për media të lira, përmes të cilit do të mbështeten projekte me interes publik. Vetëm në këtë mënyrë mund të krijohet mundësia për mbështetje objektive të produkteve cilësore gazetareske, të cilat do të mundësojnë financimin e projekteve për gazetarinë investigative dhe analitike, por edhe për prodhimin e përmbajtjeve dokumentare, edukative, argëtuese dhe edukative. Kjo është mënyra e vetme nëse Qeveria dhe autoritetet lokale dëshirojnë sinqerisht të ndihmojnë gazetarinë profesionale, në të njëjtën kohë të kontribuojnë në përmirësimin e të ardhurave të gazetarëve dhe punonjësve mediatik, dhe në këtë mënyrë të kontribuojnë në ngritjen e standardit social në sektorin mediatik.
