SHGM reagon ndaj përmbajtjes kërcënuese të drejtuar ndaj gazetarëve Aleksandar Mitovski dhe Millosh Milloshevski

Shoqata e Gazetarëve të Maqedonisë (SHGM) shpreh shqetësim serioz për shkak të një përmbajtjeje kërcënuese të publikuar në rrjetin social Facebook, ku është shpërndarë një fotografi e montuar e gazetarit Aleksandar Mitovski, i paraqitur si i vdekur në arkivol, ndërsa në komentin shoqërues janë drejtuar mesazhe kërcënuese ndaj gazetarit Millosh Milloshevski, përfshirë edhe një kërcënim të drejtpërdrejtë për jetën e tij.
Në publikim përdoret një formulim kërcënues që paralajmëron dhunë ndaj gazetarit, gjë që përbën një përpjekje serioze për frikësim dhe ngre shqetësime për sigurinë e gazetarëve të përfshirë. Përmbajtje të tilla janë veçanërisht shqetësuese kur përhapen përmes rrjeteve sociale dhe mund të nxisin më tej armiqësi dhe presion ndaj gazetarëve.
SHGM kërkon nga institucionet kompetente që ta shqyrtojnë me kujdes përmbajtjen, të përcaktojnë rrethanat në të cilat është publikuar dhe të ndërmarrin masa përkatëse në kuadër të kompetencave të tyre. Njëkohësisht, u bëjmë thirrje platformave të rrjeteve sociale që të veprojnë në mënyrë të duhur ndaj denoncimeve për përmbajtje që përmbajnë kërcënime dhe frikësim.
SHGM rikujton se kërcënimet ndaj gazetarëve janë të papranueshme dhe se siguria e tyre duhet të garantohet, pavarësisht temave për të cilat raportojnë, qëndrimeve të tyre apo angazhimit publik. Gazetaria e lirë dhe e pavarur nuk guxon të jetë objekt i frikësimit dhe kërcënimeve me dhunë.
