SHGM: Prezantohen sfidat e gazetarëve para institucioneve në Bruksel

Përfaqësuesit e Shoqatës së Gazetarëve të Maqedonisë (SHGM), së bashku me dy organizata të tjera të shoqërisë civile nga vendi, realizuan një sërë takimesh me deputetë të Parlamentit Evropian, me përfaqësues të Shërbimit Evropian për Çështje të Përbashkëta dhe me misionet e përhershme të Francës dhe Gjermanisë, si dhe me trupa të tjerë punues të BE-së.

Temë e takimeve ishte shkëmbimi bilateral i informacioneve për gjendjen e të drejtave të njeriut, lirinë e mediave dhe lirinë e shprehjes, si dhe gjendjen e procesit negociator ndërmjet BE-së dhe Maqedonisë së Veriut. Në emër të gazetarëve të Maqedonisë së Veriut, Sead Rizvanoviq, i cili është anëtar i Këshillit Mbikëqyrës të SHGM-së, prezantoi progresin dhe problemet që ekzistojnë në sferën e mediave dhe profesionit të gazetarit.

Ky aktivitet është në kuadër të organizatës Civil Rights Defenders, puna e së cilës ndër të tjera përfshin mbështetjen e organizatave dhe monitorimin e situatës me të drejtat e njeriut dhe sundimin e ligjit në Maqedoninë e Veriut.