SHGM: Poshtërimi publik i gazetarëve të rinj krijon një mjedis të dëmshëm për punonjësit mediatikë
Shoqata e Gazetarëve të Maqedonisë (SHGM) reagon ndaj publikimit në rrjetin social Facebook nga Branko Triçkovski, në të cilin gazetari dhe moderatori Aleksandar Vidinovski është ekspozuar ndaj fyerjeve të rënda, nënçmimit dhe etiketimeve poshtëruese.
Në publikimin e tij nuk kritikohet ndonjë veprim konkret profesional, përmbajtje gazetareske apo paraqitje publike përmes fakteve dhe argumenteve, por sulmohet integriteti personal dhe profesional i një punonjësi mediatik duke përdorur fjalë fyese. Një mënyrë e tillë komunikimi është e papërgjegjshme, joproduktive dhe e dëmshme për hapësirën publike.
SHGM rikujton se kritika konstruktive ndaj mediave, gazetarëve dhe moderatorëve është legjitime në një shoqëri demokratike, por ajo duhet të bazohet në argumente, fakte dhe standarde profesionale. Sulmet personale nuk kontribuojnë për një gazetari më të mirë, por krijojnë një atmosferë ku punonjësit mediatikë trajtohen si objektiv legjitim për tallje, fyerje dhe diskreditim.
Veçanërisht e dëmshme është kur një komunikim i tillë drejtohet ndaj gazetarëve dhe punonjësve më të rinj të mediave, pasi inkurajohen edhe përdorues të tjerë të rrjeteve sociale të ndjekin këtë qasje të papërshtatshme. Në vend që të nxitet zhvillimi profesional, debati publik dhe mendimi kritik, publikime të tilla krijojnë presion, demotivim dhe ndjenjën se puna e tyre mund të nënçmohet pa bazë dhe pa përgjegjësi.
Figurat publike, komentatorët dhe të gjithë pjesëmarrësit në debatin publik kanë përgjegjësi që të mos nxisin një mjedis armiqësor ndaj gazetarëve. Mospajtimi me qëndrimin, paraqitjen apo zgjedhjen profesionale të dikujt mund të shprehet qartë dhe në mënyrë kritike, por pa fyerje personale, poshtërime dhe gjuhë që cenon dinjitetin e punonjësve mediatikë.
Mbrojtja e dinjitetit profesional dhe krijimi i një mjedisi të sigurt pune për gazetarët është interes publik dhe parakusht për një debat të shëndetshëm demokratik.
