SHGM përshëndet vendimin e Element PR për ndërprerjen e kontratës me qytetin e Shkupit

Shoqata e Gazetarëve të Maqedonisë (SHGM) përshëndet vendimin e agjencisë “Element PR” për ndërprerjen e kontratës me Qytetin e Shkupit, si një veprim me të cilin tregohet përgjegjësi shoqërore. Ky është një shembull pozitiv që duhet të shndërrohet në praktikë.

Në njoftimin e tyre për publikun agjencia “Element PR” shkruan: “Si agjenci që rregullisht bashkëpunon me mediat dhe gazetarët, respektojmë plotësisht gazetarinë, kodin dhe parimet e punës. Pjesë e ekipit të agjencisë janë edhe ish-gazetarë, që është një arsye shtesë për respektimin e kodit të etikës dhe standardeve gazetareske dhe ruajtjen e kredibilitetit tonë”.

Kujtojmë se më 10 shtator në ueb-faqen e Byrosë për prokurime publike u njoftua se qyteti i Shkupit planifikon të investojë gati 5 milionë denarë për “Përgatitjen dhe realizimin e fushatave promovuese për projekte të veçanta për aktivitetet e qytetit të Shkup” përmes një agjencie marketingu. Pas njoftimit, Shoqata e Gazetarëve të Maqedonisë reagoi me një njoftim për opinionin sepse me këtë mënyrë të financimit të mediave, Qyteti i Shkupit shkel moratoriumin për ndalimin e fushatave publike në mediat private dhe në mënyrë të drejtpërdrejtë shkel nenin 102 të Ligjit për shërbime mediatike audio dhe audiovizuele për ndalimin e reklamave, si dhe vendimin e Qeverisë nga viti 2017 për ndalimin e reklamave në mediat tradicionale dhe në ato online.

U bëjmë thirrje edhe agjencive tjera të marketingut që punojnë me komunat apo me institucione të tjera shtetërore në këtë mënyrë apo në mënyrë të ngjashme që ta ndjekin këtë praktikë.