SHGM: MPB të bëjë hetim të brendshëm urgjent për rastin e gazetares Delevska
Shoqata e Gazetarëve të Maqedonisë (SHGM) dënon veprimin e zyrtarëve të Ministrisë së Punëve të Brendshëm ndaj koleges Sonja Kolevska-Delevska nga redaksia digjitale sakamdakazham.mk (SDK.MK), e cila sot është thirrur në bisedë zyrtare në stacionin policor Qendër për shkak të tekstit të publikuar, pas ankesës së një nëpunëses e cila është e punësuar si drejtuese në Ministrinë e Drejtësisë.
SHGM paralajmëron se thirrja e gazetarëve dhe punonjësve mediatik në bisedë zyrtare në stacion policor për shkak të një teksti të publikuar, çon në censurë dhe autocensurë tek gazetarët. Ky rast me kolegen Delevska mund të ndikojë negativisht në lirinë e informimit dhe fjalës publike. Paralajmërojmë se nëse kjo bëhet praktikë, mund të kufizojë seriozisht gazetarët që të raportojnë lirisht për çështje me interes publik dhe në të njëjtën kohë t’i dekurajojë ata që të punojnë në tema që lidhen me korrupsionin dhe abuzimin e pushtetit. Prandaj kërkojmë nga Ministria e Punëve të Brendshme që të bëjë një hetim të brendshëm urgjent për këtë rast.
Pas ftesës së dërguar gjatë fundjavës së kaluar nga pjesëtarët e policisë në adresën e shtëpisë së gazetares Sonja Kolevska-Delevska, ajo sot ishte në stacionin policor Qendër në Shkup për një “bisedë zyrtare lidhur me ankesën” për një tekst të publikuar më parë.
Thirrja e gazetares nga policia është bërë për shkak të tekstit me titull “Një avokate pretendon se i është kërkuar ryshfet nga një drejtuese e Ministrisë së Drejtësisë dhe pasi ka refuzuar është shantazhuar të heqë dorë nga paratë që i takojnë“, i publikuar më 27 prill këtë vit nga SDK.МК. Avokatja për vonesën e pagesës nga Ministria e Drejtësisë ka fituar lëndën në Gjykatën Administrative. Paratë ende nuk i janë paguar, por Ministria e ka fshirë nga regjistri i avokatëve që ofrojnë ndihmë juridike falas për të cilën shpenzimet mbulohen nga Ministria, thuhet në tekstin e SDK.MK.
Theksojmë se nëse ndonjë qytetar është i pakënaqur nga mënyra e raportimit në mediat, atëherë i ka në dispozicion mekanizmat vetërregulluese. Besojmë se në rastet kur një qytetar ankohet për shpifje apo fyerje të mundshme, pjesëtarët e MPB-së nuk guxojnë t’i “disiplinojnë” gazetarët duke i thirrur për biseda zyrtare në stacionet policore.
