SHGM: Ministria e Shëndetësisë duhet të sigurojë qasje të barabartë për të gjitha mediat
Shoqata e Gazetarëve të Maqedonisë (SHGM) shpreh shqetësim për sjelljen arbitrare dhe joprofesionale të Ministrisë së Shëndetësisë dhe të shërbimit për marrëdhënie me publikun, të cilët sot nuk siguruan praninë zyrtare të mediave gjatë vizitës në Klinikën për Pulmologji dhe Alergologji.
Pas disa kërkesave të gazetarëve që mbulojnë fushën e shëndetësisë dhe që disa herë iu drejtuan SHGM-së për këtë çështje, sot është ftuar vetëm agjencia MIA për të realizuar incizime në klinikë, ndërsa mediat e tjera nuk janë ftuar zyrtarisht. Kjo qartazi tregon kufizim të qasjes në ngjarje me interes publik, krijon përshtypjen e diskriminimit dhe ngre dyshime për mundësinë e fshehjes së informacionit.
SHGM u kujton institucioneve kompetente se mediat kanë të drejtë të raportojnë për të gjitha ngjarjet me interes publik pa diskriminim, ndërsa institucionet janë të obliguara të sigurojnë transparencë dhe qasje të barabartë në informata për të gjithë gazetarët. Kjo situatë është veçanërisht serioze në kontekstin e konflikteve të mëparshme dhe pamundësisë së qasjes në informacion nga kabineti i ministrit të Shëndetësisë.
SHGM bën thirrje për një rishqyrtim urgjent të praktikave të Ministrisë së Shëndetësisë, sigurimin e qasjes së të gjitha mediave në informata me interes publik dhe respektimin e standardeve profesionale në komunikimin me gazetarët.
