SHGM: Milenko Nedelkovski humbi procesin gjyqësor kundër Sekulovskës, Srbinovskit dhe Pirovskës

Gjykata Themelore Civile Shkup e refuzoi si të pabazuar padinë e Milenko Nedelkovskit për caktimin e përgjegjësisë për shpifje dhe kompensim të dëmit kundër gazetarëve.

Para Gjykatës Themelore Civile Shkup, më 06.12.2021, Milenko Nedelkovski ka paraqitur padi kundër gazetarëve Dejan Srbinovski dhe Biljana Sekulovska si dhe kundër drejtoreshës së Komitetit të Helsinkit, Urania Pirovska. Me këtë padi është kërkuar përcaktimi i përgjegjësisë për shpifje dhe kompensimi i dëmit në lidhje me emisionin “25 Minuta” me titull: “Gjuha e urrejtjes – pse nuk sanksionohet?”, i transmetuar më 12.09.2021 në Televizionin 24. Në këtë emision, nga ana e të paditurve, paditësi Milenko Nedelkovski përmendet si shembull i personit që përhap gjuhën e urrejtjes, në mënyrë që me veprimet e tij promovon, nxit dhe përhap urrejtje, dhunë dhe intolerancë.

Nga ana e avokatit të gazetarëve dhe Pirovska, në përgjigjen e padisë iu bashkëngjitën edhe materiale dëshmuese, të cilat në mënyrë të padiskutueshme dëshmojnë se edhe para transmetimit të emisionit “25 Minuta”, paditësi ka qenë i njohur në opinion si një person që përhap gjuhë të urrejtjes, prandaj të pandehurit kanë pasur arsye për të theksuar pretendimet në fjalë.

Ndër të tjerash, thuhet se gjykata duhet të marrë parasysh edhe Parimet 6 dhe 7 të Rekomandimit Nr. R (97) 20 të Komitetit të Ministrave të Këshillit të Evropës për “gjuhën e urrejtjes”, e cila tregon qartë faktin se:

“Ligjet dhe praktikat kombëtare në fushën e gjuhës së urrejtjes duhet të marrin parasysh rolin e mediave në komunikimin e informatave dhe ideve që tregojnë, analizojnë dhe shpjegojnë shembuj specifik të gjuhës së urrejtjes dhe këtë fenomen në përgjithësi, si dhe të marrin parasysh të drejtën e publikut për të marrë informacione dhe ide”, domethënë se raportimi për racizmin, ksenofobinë, antisemitizmin dhe formave të tjera të intolerancës është tërësisht i mbrojtur me nenin 10, paragrafi 1 nga Konventa Evropiane për të Drejtat e Njeriut.

Pas përfundimit të seancës kryesore, më 09.11.2022 gjykata ka mbajtur seancën për shpalljen e aktgjykimit, në të cilën është njoftuar se padia e paditësit është refuzuar si e pabazuar, duke i liruar të pandehurit nga përgjegjësia për shpifje dhe kompensim për dëmet.