Zbatimi efektiv i ligjeve për siguri më të madhe të gazetarëve ishte një nga temat kryesore për të cilët u bisedua në takimin e sotëm të punës me ministrin Bojan Mariçiq i organizuar nga Shoqata e Gazetarëve të Maqedonisë (SHGM). 

Ndryshimet dhe plotësimet në Kodin Penal që ofrojnë mbrojtje sistematike të gazetarëve në rast të shkeljes së të drejtave të tyre si dhe Ligji për Përgjegjësinë Civile për Shpifje dhe Fyerje me të cilin zvogëlohet dëmi jopasuror për gazetarët janë tashmë në procedurë parlamentare dhe pritet në periudhën në vijim të dy ligjet të miratohen në Kuvend. 

Kryetari i SHGM-së, Mlladen Çadikovski gjatë takimit theksoi se vendi ynë ka një numër të madh obligimesh që duhet t’i përmbush në mënyrë që të përmirësohen të drejtat e punonjësve mediatik. Këto detyrime janë përcaktuar në Rekomandimin e Këshillit të Evropës CM/Rec(2016) 4 për mbrojtjen e gazetarisë dhe sigurinë e gazetarëve dhe punonjësve mediatik, si dhe në rekomandimet e reja të Komisionit Evropian të 16 shtatorit 2021 për përmirësimin e pozitës dhe sigurisë së gazetarëve në BE. 

Në takimin të dyja palët u dakorduan që në javët në vijim Ministria e Drejtësisë do të nisë koordinimin midis SHGM-së dhe organizatave partnere mediatike së bashku me përfaqësuesit e prokurorisë, gjykatave civile dhe penale, por edhe Akademisë për Trajnimin e Gjyqtarëve dhe Prokurorëve Publikë. Qëllimi i këtij koordinimi është të fillojë bashkëpunimi ndërsektorial në mënyrë që të zbatohen më mirë ndryshimet e reja në Kodin Penal për mbrojtjen e punonjësve mediatik, si dhe rekomandimet e Këshillit të Evropës dhe Komisionit Evropian.