SHGM: komentet e kryeministrit për filmin dokumentar të IRL-së janë të papërshtatshme
Shoqata e Gazetarëve të Maqedonisë reagon ndaj deklaratave të kryeministrit Zoran Zaev në intervistën e fundit e publikuar në gazetën javore “Fokus”, në lidhje me serialin dokumentar “Redaksioni” dhe episodin e parë i titulluar si “Konspiracion kundër ajrit” i Laboratorit të reporterëve hulumtues (IRL).
Kryeministri Zaev duke u përgjigjur në një pyetje gjatë intervistës thotë se “duhet të pyetet edhe pala tjetër… është rend të pyetni FENI-n ose dikë tjetër që është përmendur nga përdoruesit e mazutit… nuk i shoh dy palët në këtë film dokumentar”. Më pas ai shton se dyshon në lehtësinë e asaj që është thënë pa argumentime lidhur me historinë hulumtuese të IRL-së për temën që e përpunojnë gazetarët lidhur me ndotjen e ajrit në vend.
Qëndrimi i tillë publik dhe komenti i Kryeministrit dhe njëkohësisht Kryetar i partisë në pushtet, lidhur me punën hulumtuese të gazetarëve mund të ngrejë dyshime në kredibilitetin e punës së kolegëve tanë, dhe në këtë mënyrë të ndikohet në kufizimin e lirisë së shprehjes. Nga Kryeministri Zaev pritet të inkurajojë gazetarët hulumtues në përpjekjet e tyre për të zbuluar keqpërdorimin e mundshëm të institucioneve si një mekanizëm për të parandaluar korrupsionin dhe më pas për të reaguar edhe organet e drejtësisë.
Qëndrime të tilla në lidhje me punën e gazetarëve nga ana e zyrtarëve të lartë të qeverisë dhe përfaqësues të partive mund të krijojnë një ,,efekt ftohës”, duke i dekurajuar kështu gazetarët që ata të punojnë në tema lidhur me korrupsionin dhe keqpërdorimin e pushtetit. Nëse një produkt gazetaresk është etik apo jo, duhet të vendoset nga organet vetë-rregulluese. Nëse palët e interesuara të cilave u referohet historia specifike e hulumtimit, kanë vërejtje në lidhje me aplikimin e standardeve etike, përkujtojmë se ekzistojnë mekanizma funksionale të vetë-rregullimit të medias, ku çdo qytetar mund të paraqesë një ankesë.
