SHGM kërkon nga PTHP departament të posaçëm për zgjidhjen e sulmeve ndaj gazetarëve

Kryetari Mlladen Çadikovski, drejtori Dragan Sekullovski dhe avokati që përfaqëson një grup gazetarësh për përgjime të paligjshme, Filip Medarski, dje zhvilluan takim me Prokurorin Publik të Shtetit, Lubomir Joveski.

Në takimi u hapën shumë çështje që ndërlidhen me përmirësimin e sigurisë së gazetarëve dhe punonjësve të mediave dhe se si Prokuroria Themelore Publike duhet të jetë më aktive në ndjekjen e atyre që i kërcënojnë gazetarët dhe i shkelin të drejtat e tyre.

Çadikovski vuri në dukje trendin e rritur të kërcënimeve ndaj gazetarëve në vitin 2020: “Në regjistrin e SHGM-së për sulmet ndaj gazetarëve, që nga fillimi i këtij viti kemi regjistruar 14 sulme ndaj gazetarëve, nga të cilat më shumë se gjysma janë ndaj gazetareve gra. Në vitin 2019 kishim vetëm 4 sulme gjithsej dhe ky trend negativ duhet të ngrejë alarmin kryesisht në PTHP, veçanërisht duke pasur parasysh se, sipas evidencës sonë, nuk ka asnjë aktakuzë të vetme të ngritur kundër sulmuesve”.

Përfaqësuesit e SHGM-së kërkuan proaktivitet më të madh për këto raste nga Prokuroria, dhe u propozua themelimi i një departament të posaçëm në Prokurori për të ndjekur sulmet ndaj gazetarëve dhe punonjësve të mediave. “Detyra e këtij departamenti të posaçëm është të hetojë jo vetëm shkeljet e të drejtave të gazetarëve për këtë vit, por edhe rastet e vjetra, sepse vetëm në këtë mënyrë do të përmirësohet praktika negative e mosndëshkimit, që është aktualisht e pranishme”, theksoi drejtori Sekullovski.

Sipas Joveskit, në periudhën e ardhshme PTHP-ja do të përpiqet të kontrollojë rastet e regjistruara nga SHGM-ja për sulme ndaj gazetarëve dhe do të bisedohet në mënyrë interne për themelimin e departamentit të posaçëm.

Avokati Medarski, në cilësinë përfaqësuesit ligjor të SHGM-së, në rastin e përgjimit të paligjshëm të gazetarëve, kërkoi ndihmë nga Prokurori Publik i Shtetit në sigurimin e provave, se numrat e telefonit që i kanë përdorur gazetarët gjatë periudhës kritike kanë qenë subjekt i përgjimeve të paautorizuara. Kjo mbështetje nga Prokuroria Themelore Publike për këtë procedurë është e nevojshme në drejtim të argumentimit shtesë të padisë në emër të gazetarëve të drejtat e të cilëve janë shkelur në këtë çështje.