SHGM: Ish-ministri i drejtësisë po tenton të censurojë tema me interes publik

Shoqata e Gazetarëve të Maqedonisë (SHGM) dënon ashpër qëndrimin arrogant të ish-ministrit të drejtësisë, Adnan Jashari, i cili dje ka kërkuar nga gazetarja e “Fokus”, Frosina Fakova-Serafinoviq që të fshijë një tekst lidhur me dhënien e provimit të jurisprudencës nga djali i kryetarit të Kuvendit Talat Xhaferi në vitin 2015.

Sipas informatave që janë në dispozicion të publikut, mund të shihet se në vitin 2015 ministër i drejtësisë ka qenë Adnan Jashari, andaj “Fokus” i ka kërkuar koment për tërë rastin.

Pasi ka parë tekstin e publikuar, ish-ministri i drejtësisë Jashari ka komunikuar me gazetaren përmes një mesazhi në aplikacionin Viber, duke thënë se ky ishte një lajm i gabuar dhe ka kërkuar që të fshihet teksti me temën që është në interes të publikut.

Kujtojmë se kjo procedurë është në kundërshtim me nenin 16 të Kushtetutës, i cili garanton lirinë e shprehjes dhe ndalon censurën.

Ky është rasti i dytë gjatë kësaj jave i komunikimit të papërshtatshëm ndaj gazetarëve, prandaj Shoqata e Gazetarëve të Maqedonisë paralajmëron se ky qëndrim ndaj gazetarëve dhe punonjësve mediatik nga ana e personave përgjegjës apo ish-funksionarëve shtetëror është i papranueshëm dhe nuk guxon të përsëritet.

Sjellja e tillë paraqet presion mbi lirinë e informimit të publikut dhe kërcënim për interesin publik.