Shoqata e Gazetarëve të Maqedonisë (SHGM) përsëri dënon diskualifikimet publike si dhe qëndrimin e papërshtatshëm të Kryetarit të Komunës së Strugës Ramiz Merko ndaj gazetarit të televizionit Alsat M nga Ohri. 

Në një konferencë për shtyp e mbajtur më 8 korrik, Kryetari Merko, në vend që t’u përgjigjej pyetjeve të gazetarëve në lidhje me akuzat nga opozita dhe pyetjeve lidhur me ndërtimin e objekteve në auto-kampin Livadishtë, ai përsëri verbalisht i sulmoi gazetarët. Merko akuzoi kolegun tonë që ka punuar për opozitën me fjalët: “E di që edhe ju jeni me Aleancën dhe pyetja juaj nuk shkon këtu” pasi i parashtruan një pyetje gazetareske. 

Ky është incidenti i dytë publik me gazetarë në të cilin është përfshirë Kryetari Merko në më pak se një muaj, duke marrë parasysh që pak më herët ai ofendoi edhe kolegen nga Alfa TV gjatë një konference për shtyp në të cilën u bënë pyetje në lidhje me ndërtesat në brigjet e Liqenit të Ohrit në rajonin e Strugës. 

SHGM do ta informojë bashkësinë ndërkombëtare për sjelljen e papërshtatshme të Kryetarit Merko ndaj gazetarëve dhe do t’u kërkojë gazetarëve vendas të mos mbulojnë konferencat për shtyp të organizuara nga Komuna e Strugës nëse ai nuk kërkon falje për sjelljen e tij ndaj kolegëve tanë. 

Përkujtojmë se kryetarët e komunave janë zyrtarë të zgjedhur që paguhen nga qytetarët dhe ata janë të detyruar të kultivojnë një qëndrim profesional ndaj gazetarëve dhe punonjësve mediatik në mënyrë që të japin llogari për punën e tyre dhe në asnjë rast nuk mund të arsyetohet konfrontimi personal në ngjarjet publike.