SHGM: Funksionarët duhet të përgjigjen në pyetjet e gazetarëve

Shoqata e Gazetarëve të Maqedonisë (SHGM) reagon ashpër ndaj qëndrimit injorant, joprofesional dhe tejet poshtërues të sekretarit të përgjithshëm të qytetit të Shkupit, Zoran Gligorov, ndaj ekipeve gazetareske gjatë konferencës së sotme për media.

Sekretari i përgjithshëm i Qytetit të Shkupit, Gligorov sot në fjalimin e tij para ekipeve mediatike dha një deklaratë të shkurtër ku i akuzoi transportuesit privatë për bllokadë politike të qytetit dhe në fund nuk deshi të përgjigjet në pyetjet e gazetarëve, me arsyetimin se kishte obligime të tjera. Për veprimin e tillë të tij, kolegët gazetarë reaguan të zhgënjyer duke treguar se ata nuk kanë ardhur aty vetëm për të mbajtur mikrofonat, por edhe për të bërë pyetje që janë me interes publik për qytetarët e qytetit të Shkupit.

Apelojmë që zyrtarët publikë të përpiqen t’u japin përgjigje të gjitha pyetjeve gazetareske, e të mos i injorojnë dhe poshtërojnë gazetarët dhe punonjësit mediatik.

Kujtojmë se gazetarët janë zëri i publikut dhe detyra e tyre kryesore është të hetojnë dhe të bëjnë pyetje që janë me interes publik, ndërsa zyrtarët janë ata që duhet t’u përgjigjen atyre pyetjeve dhe të sigurojnë kushte të sigurta për kryerjen e punës së tyre.