MPB ka dorëzuar njoftim deri tek SHGM se është ngritur padi penale kundër A.E (36) nga fshati Tearcë e Tetovës, për shkak ekzistimit të dyshimit për kryerjen e veprës penale “kërcënim të sigurisë” kundër gazetarëve. Përgjigja e MPB-së lidhur me këtë rast është për tu përshëndetur ndërsa hapi i ardhshëm është proaktivitet urgjent i prokurorisë dhe më pas i gjykatës me qëllim ata që i shkelin të drejtat e gazetarëve të ballafaqohen me drejtësinë.
 Rikujtojmë se më 22.03.2021 nga ana e Shoqatës së Gazetarëve të Maqedonisë deri tek SPB Tetovë është dorëzuar kërkesë për veprim pas denoncimeve për kërcënim  të sigurisë së gazetarëve dhe mediumeve në rrjetin social Fejsbuk. Bëhet fjalë për rast në të cilin nga profili i personit të emëruar si Arben Esati u publikua përmbajtje e shoqëruar me kërcënime eksplicite drejtuar gazetarëve dhe punonjësve mediatik nga mediat: Pa cenzurë, TV 21, Gazeta Express, TV Koha, Koha News, Kumanovasot, TV Shenja dhe Lajmpress.
Publikimi i tillë nga personi Arben Esati ka shkaktuar ndjenjë të frikës dhe pasigurisë për jetën tek një pjesë të gazetarëve nga këto media dhe anëtarët e familjeve të tyre.
Pas intervenimit të SHGM-së në koordinim me një pjese të gazetarëve të cilët janë të përfshirë në këtë rast u dorëzua kërkesë deri tek MPB për të zbatuar hetim urgjent.
Ky është rasti i parë më serioz i shkeljes së të drejtave të gazetarëve të cilën e ka regjistruar MPB në vitin 2021. Rikujtojmë se në vitin 2020 SHGM ka regjistruar 14 sulme dhe kërcënime serioze ndaj gazetarëve ndërsa vetëm një rast kishte epilog gjyqësor.