SHGM drejtuar PODEM-it: Zyrtarët publikë duhet të tregojnë respekt ndaj gazetarëve

Shoqata e Gazetarëve të Maqedonisë (SHGM) ka dërguar një letër shqetësimi dhe reagimi drejtuar kryetarit të partisë politike PODEM, Zhivko Jankulloski, për shkak të qëndrimit të papërshtatshëm dhe joprofesional në rrjetet sociale ndaj gazetares Aneta Blazhevska nga ana e zëvendësministrit të Financave dhe anëtarit të kësaj partie, Nikollçe Jankullovski.

Ai, në postime të mediumit online apla.mk të shpërndara në rrjetet sociale nga profili i tij personal, ka komentuar në mënyrë të pahijshme dhe me ton përçmues ndaj gazetares Blazhevska, duke i shkruar:
“Vetëm përpara, vazhdo kështu. Sa për kualifikime, je shumë larg gazetarisë profesionale. Tung.”

SHGM vlerëson se një qëndrim i tillë ndaj gazetarëve dhe mediave është i papranueshëm, veçanërisht kur vjen nga zyrtarë publikë, dhe kujton se respektimi i gazetarëve dhe punës së tyre është një pjesë thelbësore e një shoqërie demokratike.

Shoqata rikujton se respektimi i gazetarëve dhe i punës së tyre përbën element kyç të dialogut demokratik dhe u bën thirrje përfaqësuesve të institucioneve që të kontribuojnë në ndërtimin e një kulture të respektit të ndërsjellë dhe komunikimi profesional.

Gazetarët luajnë një rol të rëndësishëm në informimin e publikut dhe në mbikëqyrjen e punës së institucioneve, dhe çdo përpjekje për t’i degraduar ata ose për të cenuar integritetin e tyre mund të dëmtojë besimin e qytetarëve në procesin demokratik.

SHGM i inkurajon partitë politike dhe institucionet që të promovojnë komunikim të hapur dhe konstruktiv me mediat, si pjesë e detyrimit për transparencë dhe llogaridhënie ndaj publikut.