SHGM dhe SPGPM: Sjellja e papërshtatshme e përfaqësuesve të Ministrisë së Shëndetësisë ndaj gazetarëve është e papranueshme

Shoqata e Gazetarëve të Maqedonisë (SHGM) dhe Sindikata e Pavarur e Gazetarëve dhe Punëtorëve Mediatikë (SPGPM) shprehin shqetësim serioz për shkak të sjelljes së papërshtatshme dhe joprofesionale ndaj gazetareve gjatë një ngjarjeje publike në Shkup, ku ishte i pranishëm ministri i Shëndetësisë Azir Aliu së bashku me personin përgjegjës për protokollin nga ministria.

Komunikimi i papërshtatshëm nga ana e punonjëses së ministrisë, përgjegjëse për protokollin, ndodhi pasi një grup gazetarësh i kërkuan deklarata, për çka ata morën përgjigje nga ajo se “nuk mundet”, ndërsa njërës prej gazetareve iu drejtua me fjalët: “Gazetare e paedukatë, arrogante dhe më e pacipa”.

Ne konsiderojmë se një sjellje e tillë është e papranueshme dhe e papërshtatshme dhe përbën një goditje serioze ndaj dinjitetit të gazetarëve, lirisë së shprehjes dhe të drejtës së publikut për t’u informuar. Mungesa e sanksioneve për raste të tilla mund të krijojë rrezik për përsëritjen e sjelljeve të ngjashme nga funksionarë të tjerë publikë.

Njëkohësisht, e përshëndesim gjestin e solidaritetit nga gazetarët dhe punëtorët mediatikë të tjerë që ishin të pranishëm aty dhe të revoltuar nga sjellja e papërshtatshme, në mënyrë kolegjiale e kanë lëshuar ngjarjen.

SHGM dhe SPGPM i bëjnë apel Ministrisë së Shëndetësisë që urgjentisht ta rishikojë këtë rast dhe të sigurojë masa adekuate për sjellje profesionale të të gjithë funksionarëve publikë ndaj mediave. Kjo është me rëndësi thelbësore për mbrojtjen e të drejtës së gazetarëve për qasje në informata me interes publik dhe për ruajtjen e besimit ndaj institucioneve.