SHGM dhe SPGPM: Praktikë shqetësuese e organeve hetimore në rastet me gazetarë

Shoqata e Gazetarëve të Maqedonisë (SHGM) dhe Sindikata e Pavarur e Gazetarëve dhe Punonjësve Mediatik (SPGPM) reagojnë ndaj veprimeve të Prokurorisë Themelore Publike (PPO) dhe Ministrisë së Punëve të Brendshme (MPB), këtë herë në lidhje me Vesna Jovanovska – Dojçinovska, redaktore në Televizionin Telma.

Prokurori në Prokurorinë e Shkupit ka hapur lëndë për gjuhë të urrejtjes nga ana e qytetarit ndaj një qytetari tjetër, ndërsa për hetim dhe argumentim të kallëzimit me prova, MPB ka urdhëruar sigurimin e materialeve audio dhe video të transmetuara nga TV Telma, por ka dhënë edhe urdhër  për të ftuar në bisedë informative redaktoren Vesna Jovanovska – Dojçinovska. Policia e ka kërkuar gazetaren në adresën e shtëpisë së saj, duke mos i dhënë detaje se për çfarë saktësisht duhet të paraqitet në stacionin policor.

Prandaj, SPGPM dhe SHGM e vlerësojnë si problematike procedurën përmes së cilës MPB-ja dhe Prokuroria Publike i përfshijnë gazetarët në lëndët e tyre, pa i informuar paraprakisht për atë se pse janë të ftuar në bisedime zyrtare.

Theksojmë se të gjitha rregulloret, standardet dhe rekomandimet ndërkombëtare tregojnë se kur organet e zbatimit të ligjit veprojnë në raste që përfshijnë gazetarë, ata duhet ta bëjnë këtë në mënyrë që veprimet e tyre të mos kenë efektin e frikësimit, kërcënimit ose kufizimit të lirisë të gazetarëve dhe mediave. Gjithashtu, Ministria e Punëve të Brendshme dhe Prokuroria Publike së paku mund të kontaktojnë gazetarët dhe të sqarojnë rrethanat në mënyrë transparente, përndryshe kjo mund të ndikojë seriozisht në kushtet në të cilat gazetarët e kryejnë punën e tyre.

Ky rast është një argument tjetër pse nevojitet një departament i veçantë në kuadër të PThP-së e cila do të merret me rastet dhe lëndët që përfshijnë gazetarë dhe punonjës mediatik. Kujtojmë se nevoja për edukim të vazhdueshëm dhe përmirësim të njohurive të prokurorëve në mbrojtjen e gazetarëve është detyrim i shtetit si anëtar i Këshillit të Evropës.

Theksojmë se nëse ndonjë qytetar është i pakënaqur me mënyrën e raportimit në mediat, në dispozicion janë mekanizmat vetërregulluese. Çdo formë dhe mundësi tjetër ligjore e aplikuar nga gjyqësori mund të çojë në censurë dhe vetcensurë, por edhe një formë të caktuar frikësimi dhe shkaktimi i frikës, që i vë njollë të zezë qeverisjes demokratike.