SHGM dhe SPGPM: Partitë politike të shmangin shfrytëzimin e gazetarëve dhe përmbajtjeve të tyre për promovim partiak
Shoqata e Gazetarëve të Maqedonisë (SHGM) dhe Sindikata e Pavarur e Gazetarëve dhe Punonjësve Mediatik (SPGPM) reagojnë publikisht pas ankesave të disa gazetarëve, të cilët shprehën pakënaqësi që materialet e tyre mediatike janë shfaqur në një video promovuese të një partie politike në rrjetet sociale, pa pëlqimin e tyre apo të redaksive.
Kjo praktikë e partive politike për të marrë fragmente nga programet informative të mediave, ku vetë gazetarët janë pjesë, është problematike në dy plane:
Aspekti etik – Përmbajtjet gazetareske nuk duhet të përdoren për qëllime politike, sepse kjo cënon parimin e pavarësisë dhe vë në pikëpyetje besimin e publikut te profesioni. Gazetarët duhet të mbrohen nga manipulimet me punën e tyre për interesa partiake.
Aspekti juridik – Çdo përdorim i materialeve mediatike pa pëlqimin e autorëve përbën shkelje të të drejtave autoriale dhe atyre personale. Njëkohësisht, kjo praktikë mund të dëmtojë dinjitetin dhe reputacionin e gazetarëve, sidomos nëse publikimi shoqërohet me komente fyese apo kërcënuese në rrjetet sociale.
SHGM dhe SPGPM kujtojnë se disa parti tashmë kanë nënshkruar Kodin e Sjelljes në hapësirën online gjatë proceseve zgjedhore dhe referendumeve, duke u zotuar ta respektojnë atë. Veçanërisht i rëndësishëm është neni 5, i cili obligon partitë dhe kandidatët që:
të sigurojnë transparencë për përmbajtjet e sponsorizuara dhe reklamimin online;
të shmangin praktikat joetike;
të mos përdorin bota automatike apo struktura të organizuara (trolla e “troll-farma”) për shpërndarje të qëllimshme dezinformatash dhe sulme, veçanërisht ndaj gazetarëve dhe punëtorëve mediatikë.
Përdorimi i gazetarëve dhe i materialeve të tyre për qëllime partiake nuk shkel vetëm standardet profesionale dhe ligjore, por edhe minon besimin e publikut te mediat dhe në vetë procesin zgjedhor.
SHGM dhe SPGPM theksojnë se respektimi i standardeve etike dhe normave ligjore është i domosdoshëm jo vetëm gjatë fushatës zgjedhore zyrtare, por edhe në periudhën para saj, nëse duam një proces zgjedhor të drejtë e demokratik.
Apelojmë te të gjitha partitë politike dhe aktorët publikë që të përmbahen nga çdo keqpërdorim i punës dhe imazhit të gazetarëve gjatë periudhës parazgjedhore dhe fushatës. Vetëm duke respektuar pavarësinë profesionale mund të ndërtohet besimi në media dhe të garantohet një debat publik transparent dhe demokratik.
