SHGM dhe SPGPM: Ndryshimet ligjore që prekin gazetarët të miratohen sa më shpejt në Kuvend
Shoqata e Gazetarëve të Maqedonisë (SHGM) dhe Sindikata e Pavarur e Gazetarëve dhe Punonjësve Mediatik (SPGPM) sot para Kuvendit të Republikës së Maqedonisë së Veriut mbajtën konferencë për shtyp, me rastin e 2 nëntorit, Ditës ndërkombëtare për përfundimin e mosndëshkimit të krimeve kundër gazetarëve.
Para ekipeve gazetareske folën kryetari i SHGM-së, Mlladen Çadikovski dhe kryetari i SPPGPM-së, Pavle Bellovski.
“Në këtë ditë, 2 nëntor, Dita ndërkombëtare për përfundimin e mosndëshkimit të krimeve kundër gazetarëve, Shoqata e Gazetarëve të Maqedonisë kërkon nga partitë politike që menjëherë të miratojnë ndryshimet në Kodin Penal, me të cilat do të mundësohet mbrojtje më e madhe e gazetarëve dhe punonjësve mediatik. Tani, më shumë se kurrë, është e nevojshme që sulmi ndaj gazetarëve të trajtohet si sulm ndaj një zyrtari, është koha për të bërë një hap më të madh në këtë drejtim. Ka kaluar pothuajse një vit e gjysmë që presim që deputetët në Kuvend të mblidhen për të miratuar ndryshimet në Kodin Penal, në vend që të merren me lojërat e tyre të pafundme politike. Nëse jemi të sigurt se për këtë gjë ka një konsensus social në opinion, është e pakuptueshme që deputetët të vazhdojnë edhe më tutje të vonojnë me miratimin e këtyre ndryshimeve. Kërkojmë që ndryshimet menjëherë të futen në rendin e ditës dhe të votohen, në të kundërtën do të kuptojmë se liria e gazetarëve, kameramanëve dhe punonjësve mediatik nuk është prioritet i këtij Kuvendi” – tha Çadikovski.
Kryetari i SPGPM-së, Pavle Bellovski, theksoi se jemi duke pritur shumë gjatë për ndryshime që kanë rëndësi të madhe për sigurinë e gazetarëve.
“Kaluan pesë vite nga fillimi i nismës, gjatë të cilëve dëgjuam angazhimet deklarative për lirinë e mediave. Po ashtu, sot bëhen 17 muaj që kur Qeveria, përkatësisht Ministria e Drejtësisë, i dërgoi këto amendamente në Kuvend për miratim. Nuk ka asnjë rezultat. Sulmet, pavarësisht nga forma, ende i numërojmë dhe i raportojmë, por në fund pa rezultat. Mosndëshkimi vazhdon. Prandaj edhe një herë, ju kujtojmë premtimet elektorale se duhet të zbatohen urgjentisht ndryshimet ligjore që i referohen sulmeve ndaj gazetarëve. Neve nuk na interesojnë lojërat dhe interesat parlamentare. I bëjmë thirrje deputetëve që urgjentisht të bëjnë gjithçka që është pjesë e procedurës dhe të votojnë ndryshimet në Kodin Penal, të cilat së paku në letër do të përmirësojnë kushtet për përfundimin e mosndëshkimit të sulmeve ndaj gazetarëve”, tha Bellovski.
Organizatat gazetareske shprehën shqetësimin e tyre për ngecjen në miratimin e ndryshimeve ligjore në Kuvend, me qëllim të përbashkët – ndryshime pozitive në drejtim të përmirësimit të kushteve të punës së gazetarëve dhe punonjësve mediatik, si dhe rikujtuan raportin e fundit të Komisionit Evropian ku thuhet se Maqedonia ka arritur një nivel të caktuar në fushën e lirisë së shprehjes, dhe se në përgjithësi ka progres të kufizuar në raport me rekomandimet e BE-së. Gjithashtu, u theksua nevoja për vazhdimin e procesit të vetë-rregullimit, i cili duhet të çojë në përmirësimin e standardeve profesionale në gazetari.
