SHGM dhe SPGPM: Mbyllja e REL-it është humbje për interesin publik, nevojitet mbështetje për mediat e pavarura

Shoqata e Gazetarëve të Maqedonisë (SHGM) dhe Sindikata e Pavarur e Gazetarëve dhe Punonjësve Mediatikë (SPGPM) shprehin keqardhje për ndërprerjen e punës së shërbimit maqedonas të Radios Evropa e Lirë. Kjo është një tjetër goditje e rëndë ndaj gazetarisë kritike, profesionale dhe me përgjegjësi publike, jo vetëm në Maqedoni, por edhe më gjerë në rajon dhe në nivel global, në një kohë kur publikut i nevojitet më shumë informim i verifikuar, e jo më pak.

Radio Evropa e Lirë për dekada ishte një zë i njohur mediatik i lirisë, përgjegjësisë dhe interesit publik. Shërbimi maqedonas ekzistonte që nga viti 2001 dhe duke hapur tema të rëndësishme shoqërore dhe duke ruajtur standarde të larta profesionale, la një gjurmë të thellë në informimin e qytetarëve. Kolegeve dhe kolegëve që e humbën punën u shprehim solidaritet të sinqertë, respekt dhe inkurajim. Puna, integriteti dhe kontributi i tyre për interesin publik nuk duhet të anashkalohen, as të trajtohen si dëm kolateral i zakonshëm i vendimeve politike dhe buxhetore.

Ky zhvillim edhe një herë tregon se pa mekanizma të qëndrueshëm, të drejtë dhe transparentë për mbështetje, gazetaria pluraliste mbetet e cenueshme. Prandaj, SHGM dhe SPGPM rikujtojnë se krijimi i një Fondi për pluralizëm mediatik nuk është çështje vullneti të mirë, por një nevojë demokratike dhe parakusht për të nxitur gazetari cilësore, të larmishme dhe të orientuar drejt publikut. Këshilli i Evropës prej vitesh u bën thirrje shteteve të zhvillojnë strategji dhe mekanizma për qëndrueshmërinë e një ekosistemi mediatik të larmishëm dhe për krijimin e një mjedisi të favorshëm për gazetari cilësore si e mirë publike.

Kujtojmë gjithashtu se në Maqedoni kjo çështje nuk është e re. Në kuadër të agjendës së reformave mediatike të mbështetur nga Bashkimi Evropian në vitin 2023, u përgatit një draft i ri i Ligjit për media, i cili parashikon dispozita për krijimin e një fondi të tillë. Për më tepër, raportet e SHGM-së tregojnë se draft-ligjet e përgatitura më herët tashmë parashikojnë themelimin e Fondit për pluralizëm dhe diversitet mediatik dhe janë dorëzuar në ministritë përkatëse, por pa progres të mëtejshëm. Kjo do të thotë se zgjidhjet ekzistojnë dhe duhet të zbatohen në praktikë.

SHGM dhe SPGPM kërkojnë nga Qeveria dhe të gjitha institucionet kompetente që pa vonesa të mëtejshme të rifillojnë procesin për krijimin e Fondit për pluralizëm mediatik, si një mekanizëm i pavarur, i drejtë dhe transparent që do të mbrojë interesin publik, do të forcojë diversitetin e qëndrimeve editoriale dhe do të kontribuojë për kushte më të mira pune për gazetarët dhe punonjësit mediatikë. Kjo është veçanërisht e rëndësishme për të inkurajuar gazetarinë lokale dhe mediat lokale, si dhe për të nxitur trajtimin e temave me interes publik lokal.

Në të kundërtën, do të vazhdojmë të jemi dëshmitarë të dobësimit të zërave kritikë, mbylljes së redaksive dhe varfërimit të mëtejshëm të hapësirës mediatike, si në nivel qendror ashtu edhe në atë lokal.

Sot, kur po shuhet një zë i rëndësishëm mediatik, mesazhi duhet të jetë i qartë: mbrojtja e pluralizmit mediatik nuk duhet të mbetet vetëm deklarative – nevojiten politika konkrete dhe përgjegjësi institucionale.