SHGM dhe SPGPM kanë zhvilluar një takim me kryetarin e Kuvendit
Shoqata e Gazetarëve të Maqedonisë (SHGM) dhe Sindikata e Gazetarëve dhe Punonjësve Mediatik (SPGPM) zhvilluan takim me kryetarin e Kuvendit të RMV-së, Talat Xhaferi, Sekretaren e Përgjithshme, Cvetanka Ivanova dhe me një pjesë të administratorëve profesional të Kuvendit.
Në takim janë shqyrtuar dhe diskutuar kërkesat që dy organizatat i kanë dorëzuar Kuvendit javën e kaluar, gjatë protestës së mbajtur më 17 shkurt.
U kërkua një mirëkuptim dhe urgjencë më e madhe në zbatimin e ligjeve të medias që janë të rëndësishme për punonjësit e medias, si dhe të ndalet urgjentisht tendenca negative e gjuhës poshtëruese dhe agresive nga deputetët dhe politikanët ndaj gazetarëve me çka gjithnjë e më shumë po ballafaqohen gjatë punës së tyre.
SHGM dhe SPGPM shprehën shqetësimin në lidhje me zbatimin e Kodit të Etikës për Deputetët, konkretisht mosrespektimin e nenit 6, kapitulli 3, ku shkruhet qartë se :
“Deputeti duhet të përmbahet nga veprimet dhe fjalimet që mund të shkaktojnë urrejtje, intolerancë dhe dhunë mbi baza personale, ideologjike, fetare, kombëtare, gjinore apo racore”
Prandaj u diskutua për një aplikim më serioz të Kodeksit ekzistues të Etikës, i cili është në proces ndryshimi, nga Komisioni në të cilin duhet adresuar me saktësi elementet problematike në sjelljen e disa prej përfaqësuesve të popullit.
Përveç Kodeksit, u diskutua edhe për ndryshimin e Rregullores së Lëvizjes në Kuvend, e cila për herë të fundit u ndryshua në vitin 1992, ku përmes zhvillimit të përbashkët dhe shkëmbimit të përvojave dhe rekomandimeve, SHGM dhe SPGPM do të merrnin pjesë si shoqata të fushës.
Në takim nga SHGM morën pjesë Mlladen Çadikovski, Dragan Sekulovski dhe Biljana Nasteska – Kalanoska si dhe nga SPGPM që përfaqësoheshin nga Pavle Belovski dhe Tamara Grnçaroska.
