SHGM dhe SPGPM: Dënojmë qëndrimin nënçmues dhe të papërshtatshëm të Jakimovskit ndaj gazetarëve
Shoqata e Gazetarëve të Maqedonisë (SHGM) dhe Sindikata e Pavarur e Gazetarëve dhe Punonjësve Mediatik (SPGPM) dënojnë qëndrimin e papërshtatshëm dhe përçmues të Kryetarit të komunës së Karposhit, Stevço Jakimovski ndaj gazetarëve gjatë dhënies së deklaratës së sotme para Gjykatës Penale.
Në pyetjet e gazetarëve për Kryetarin Jakimovski sot para gjykatës, në vend që të përgjigjet në pyetjet lidhur me procedurën gjyqësore në të cilën ai dhe disa persona të tjerë akuzohen për keqpërdorim të pozitës dhe autoritetit zyrtar si ish-kryetar i komunës së Karposhit, ai tha se kishte aftësi të shkëlqyera menaxheriale dhe se pyetjet që i bënin gazetarët ishin “qesharake”. Ai gjithashtu akuzoi gazetarët se prania e sotme e mediave dhe gazetarëve në seancën e parë ka qenë e orkestruar nga “një qendër”.
SHGM dhe SPGPM rikujtojnë se kryetarët e komunave janë zyrtarë të zgjedhur të cilët paguhen nga qytetarët dhe kanë për obligim të kultivojnë qëndrim profesional ndaj gazetarëve dhe punonjësve mediatik në mënyrë që të japin llogari për punën e tyre dhe në asnjë rast nuk mund të justifikohet përllogaritja me gazetarët në ngjarje publike. SHGM dhe SPGPM u sugjerojnë politikanëve të përmendur që të kenë një kulturë më të lartë në komunikimin publik dhe në marrëdhëniet me punonjësit mediatik, sepse gazetarët shërbejnë për të informuar publikun dhe jo për t’i përmbushur pritjet partiake të dikujt.
SHGM dhe SPGPM apelojnë që personat publikë dhe funksionarët e zgjedhur të përmbahen nga deklaratat që në çfarëdo mënyre mund të kuptohen si etiketim të gazetarëve, sepse kjo nuk është në frymën e vlerave evropiane dhe demokratike.
