SHGM dhe Seksioni i Kameramanëve – sfidat aktuale dhe situata e kameramanëve në media
Me iniciativë të Seksionit të Kameramanëve në SHGM, dje është mbajtur takim pune me temë “Sfidat aktuale të kameramanëve në mediat private”.
Takimin e hapi kryetari i SHGM-së, Mlladen Çadikovski, i cili i përshëndeti të pranishmit dhe hapi temat për diskutim. Menjëherë pas tij kameramanëve iu drejtua drejtori i SHGM-së, Dragan Sekullovski, i cili iu referua aktiviteteve që janë zhvilluar në periudhën e kaluar, të cilat përveç gazetarëve prekin edhe kameramanët.
Ai theksoi progresin në drejtim të sigurisë së tyre gjatë kryerjes së punës dhe theksoi nevojën e mbajtjes së takimeve të kësaj natyre dhe gatishmërinë e Shoqatës për mbështetje.
Zoran Dogov, koordinator i seksionit të kameramanëve, në fjalën e tij para kolegëve, foli në përgjithësi për gjendjen me të cilën përballen kameramanët në mediat private. Një nga problemet është rritja e ngarkesës së punës e cila nuk korrespondon me numrin e kameramanëve në medium. Një problem tjetër me të cilin përballen kameramanët është mungesa e interesit nga ana e të rinjve për ta bërë këtë punë , gjë që vë në pikëpyetje të ardhmen e kameramanëve si profesion mediatik.
Në takim foli edhe Vedut Osmani, koordinator i seksionit të kameramanëve në SHGM nga rajoni i Tetovës, i cili përveç problemeve aktuale me të cilat ballafaqohen kameramanët, theks të veçantë vuri edhe në problemet me të cilat ballafaqohen kameramanët korrespondentë, të cilët për detyrimet e tyre profesionale nga media, duhet të shpenzojnë burimet e tyre financiare. Njëkohësisht, ai theksoi pakujdesinë në lidhje me orarin e punës, i cili shumë shpesh i kalon tetë orë në ditë gjatë javës, dhe angazhimet gjatë fundjavës, të cilat nuk paguhen shtesë.
Gjatë diskutimit u theksua nevoja thelbësore për përmirësimin e komunikimit të kameramanëve dhe gazetarëve më të rinj, të cilët ende po hedhin hapat e tyre të parë në botën e medias, si dhe se ka një përmirësim të lirisë së ushtrimit të veprimtarisë, lirisë e shprehjes, trajtimit nga institucionet gjatë ndjekjes së ngjarjeve, por ka ende nevojë për ndryshime të mëdha sistematike për të cilat SHGM po punon vazhdimisht.
Në fund u vu theksi te solidariteti mes kameramanëve si bazë për sfidat e ardhshme që do të kapërcejë seksioni me mbështetjen e SHGM-së.
