SHGM dhe Misioni i OSBE-së në Shkup mbajtën një kamp veror për sigurinë e gazetarëve të rinj
Shoqata e Gazetarëve të Maqedonisë (SHGM) në bashkëpunim me Misionin e OSBE-së në Shkup, realizuan kamp veror për gazetarët e rinj në Ohër, nga 11 deri më 15 korrik të vitit 2023. Tema e takimit të këtij viti ishte siguria e gazetarëve në kuadër të punës së tyre.
Qëllimi ishte të kontribuohej në ngritjen e kapaciteteve dhe përmirësimin e sigurisë së përgjithshme të gazetarëve përmes socializimit dhe shkëmbimit të përvojave dhe aftësive praktike, duke promovuar bashkëpunim më të mirë ndërmjet kolegëve, shkëmbimin e përvojës lokale dhe kuptimin më të mirë të dimensioneve gjinore të sigurisë.
Alessio Zucarini, shef i Departamentit të Dimensionit Njerëzor/ushtrues detyre i Zëvendës Shefit të Misionit të OSBE-së në Shkup, ishte i pari që mori fjalën në hapjen e kampit veror dhe theksoi se sot duhet të ballafaqohemi me sfidat me të cilat ballafaqohen gazetarët si në internet ashtu edhe jashtë tij.
“Epoka dixhitale ka sjellë me vete një grup të ri sfidash. Gazetarët përballen me një sasi në rritje të dezinformatave, sulmeve kibernetike dhe cenimit të besimit. Megjithatë, ne kemi aftësinë për të kapërcyer këto pengesa. Duke kultivuar edukimin dixhital, duke praktikuar gazetarinë etike dhe duke bashkëpunuar me ekspertë të IT-së, ne mund të ndërtojmë një peizazh dixhital elastik ku e vërteta do të mbizotërojë mbi gënjeshtrën. Ky kamp le të shërbejë si një platformë për zhvillimin tuaj ndërsa mësoni, ndani dhe punoni së bashku me kolegët tuaj gazetarë. Së bashku, ne mund të ndërtojmë një të ardhme ku siguria e gazetarëve është prioritet, shprehja e lirë mbrohet dhe liria e medias është e garantuar”.
Në hapjen e kampit foli edhe drejtori ekzekutiv i Shoqatës së Gazetarëve, Dragan Sekullovski.
“SHGM-ja dhe OSBE-ja kanë pasur një bashkëpunim strategjik vitet e fundit dhe ky kamp sigurie për gazetarët, i cili organizohet për të dytin vit radhazi, ka idenë që të bëhet një ngjarje tradicionale. Ne konsiderojmë gazetarë të rinj personat nën 35 vjeç, që janë vetëm njëqind profesionistë në këtë sektor, gjë që është vërtet shqetësuese. Përmes ngjarjeve të tilla, përveç faktit që SHGM kontribuon në ngritjen e kapaciteteve të tyre, ne inkurajojmë edhe bashkëpunimin editorial, duke pasur parasysh që janë të pranishëm gazetarë nga 20 media”– tha Sekullovski.
Gjatë kampit, një theks kryesor u vu pikërisht te siguria fizike dhe dixhitale për gazetarët, aftësitë profesionale dhe njohuritë e etikës gazetareske dhe roli i gazetarëve në mbrojtjen e të drejtave të njeriut duke përdorur teknika themelore gazetareske, qasje të reja dhe mjete multimediale dixhitale, duke përfshirë ato që janë zhvilluar nga Misioni i OSBE-së. U diskutua edhe për ndryshimet e fundit në Kodin Penal dhe Ligjin për përgjegjësinë civile për fyerje dhe shpifje dhe çfarë nënkuptojnë këto ndryshime në praktikë për punën e punonjësve mediatik.
Në kuadër të aktiviteteve që ishin planifikuar në pjesën e punës të kampit veror, përveç prezantimeve edukative të udhëhequra nga trajnerë me përvojë, pati edhe punëtori interaktive dhe punë në grupe përmes takimeve joformale dhe tubimeve të përbashkëta ku u shkëmbyen përvoja praktike mes ligjëruesve dhe pjesëmarrësve.
Në pjesën e prezantimeve edukative, Dimitar Dimitrovski nga OSBE, gazetarët e IRL-së, Sashka Cvetkovska, David Ilieski dhe Aleksandra Denkovska Goçevska, si dhe gazetarët e 360 Gradë Sreçko Popovski dhe Sllavica Filipovska, mbajtën prezantime. Prezantimet e tyre kishin edhe Millan Spirovski nga SHGM dhe kolegët Pero Momirovski dhe Darko Duridanski nga SPGPM.
Përfaqësues i MPB-së në kamp që kishte prezantim ishte Toni Angellovski, ndihmës i ministrit për marrëdhënie me publikun.
Të pranishmit patën mundësinë të mësojnë edhe teknikat e vetëmbrojtjes fizike, të cilat do të mund t’i përdorin në të ardhmen nëse gjenden në rrezik dhe për pjesëmarrësit është përgatitur një program i veçantë nga kolegu Bujat Saiti, moderator dhe animator.
Ky aktivitet është vazhdimësi e bashkëpunimit ndërmjet SHGM-së dhe Misionit të OSBE-së në Shkup, të cilët në vitet e kaluara kanë qenë aktivë së bashku në temat që kanë të bëjnë me sigurinë e gazetarëve dhe ngritjen e kapaciteteve të SHGM-së.
