SHGM dhe KEMM: Apelojmë për kujdes maksimal dhe baraspeshë etike në lajmet për vajzën e zhdukur
Shoqata e Gazetarëve të Maqedonisë (SHGM), Këshilli i Nderit në SHGM dhe Këshilli për Etikë në Media (KEMM), si pjesë e vetë-rregullimit në Maqedoni, dënojnë ashpër mënyrën se si raportojnë disa media për zhdukjen e një vajze 14 vjeçare nga Shkupi, me çka shkelin rëndë Kodin e Etikës së Gazetarëve, duke postuar informacione të pasakta dhe të pa verifikuara, kryesisht të marra nga rrjetet sociale.
SHGM dhe KEMM jua kujtojnë gazetarëve se duhet të respektojnë dhimbjen personale të familjes dhe se të gjitha raportimet për aksidente apo procese gjyqësore duhet të jenë pa sensacion.
Gjatë ditës së sotme janë regjistruar një sërë tekstesh me përmbajtje të rrejshme, të transmetuara nga komente dhe reagime në rrjetet sociale, nga profile jo të besueshme, për të cilat nuk mund të përcaktohet se kush qëndron pas tyre. SHGM përmes vendimeve të Këshillit të Nderit, si dhe KEMM, kanë deklaruar disa herë deri më tani se rrjetet sociale nuk mund të jenë burim i besueshëm informacioni nga i cili gazetarët duhet të marrin përmbajtje në mënyrë të pa kontrolluar dhe shkruajnë lajme apo tituj prej tyre, sepse profilet në FB ose profilet në rrjete të tjera, janë përgjegjësi personale e mbajtësve të profileve dhe mediat kanë detyrimin të verifikojnë informacionin përpara se ta publikojnë atë.
Publikimi pa verifikim, vetëm pse dikush ka postuar diçka diku në një rrjet social dhe është bërë lajm në një media, nuk e çliron median nga përgjegjësia.
Prandaj, SHGM dhe KEMM kërkojnë nga gazetarët dhe punonjësit mediatik që të përfshihen në raportimin e rasteve si zhdukja e një vajze 14-vjeçare nga Shkupi, por të respektojnë me përpikëri standardet e etikës profesionale, të mos përhapin frikë dhe panik, të mos publikojnë lajme të rrejshme dhe informacione të paverifikuara, duke e ndezur më tej situatën.
Këshilli i Nderit i SHGM-së, duke vepruar në bazë të parashtresave, mund të përjashtojë anëtarët nga anëtarësimi në SHGM për shkak të shkeljes së dispozitave të Kodit, dhe për këtë arsye, edhe një herë, u bëjmë thirrje të gjithë gazetarëve që të përgatisin informacionin me shumë kujdes, me raportim të ekuilibruar etik dhe verifikim serioz paraprak.
Në këtë fazë, media duhet të jetë veçanërisht e kujdesshme në paraqitjen e detajeve personale apo familjare, të cilat mund të dëmtojnë integritetin e fëmijës.
SHGM dhe KEMM inkurajojnë të gjithë qytetarët që vërejnë shkelje të Kodit t’i raportojnë në formularin përkatës të vendosur në faqen e SHGM-së ose në faqen e KEMM-it, duke ndihmuar kështu në zbulimin e mediave që devijojnë nga standardet gazetareske.
