SHGM dhe Instituti Gete – Shkup: U prezantuan përmbajtje multimediale gazetareske të natyrës sociale
Shoqata e Gazetarëve të Maqedonisë (SHGM), në bashkëpunim me Institutin Gete – Shkup, në kuadër të thirrjes publike e cila ishte e shpallur në periudhën që kaloi, mbajti promovim të përmbajtjeve gazetareske të prodhuar nga katër ekipe të përbëra me nga dy gazetarë. Ekipet u mentoruan nga ana e jurisë profesionale e përbërë prej tre anëtarësh ndër të cilët ishin Aneta Dodevska, Filjana Koka dhe Teofil Blazhevski.
Gazetarët që i krijuan storjet janë Magdalena Stojmanoviq dhe Boban Jovanoviq nga TV Sonce me temën “Si të bëhet risocializimi i suksesshëm i ish të burgosurve?”, Aleksandra Maksimovska korrespondente nga MIA dhe Suzana Andonoviq nga Radio “Bum na tema“ me storjen “Diskriminimi i grave rome”, Aleksandra Maksimovska nga TV Alfa dhe Violeta Kozhinkova nga TV 24 me temën “Fshatrat në Maqedoninë Lindore pa mjekë” dhe Teodora Cvetkovska nga “Pina” dhe Daniel Vasilev nga “360 stepeni” me temën “Të mbrojtur vetëm në letër – personat me aftësi të posaçme mbeten vetëm kur ngelin pa prindërit e tyre”.
Në këtë ngjarje folën Mlladen Çadikovski, kryetar i SHGM-së dhe Katrin Ostvald-Rihter, udhëheqëse e Institutit Gete – Shkup.
Në hapjen e ngjarjes, Çadikovski përshëndeti realizimin e këtij konkursi dhe theksoi se duhet të ketë më shumë aktivitete të kësaj natyre për të prekur tema të cilat jo gjithmonë zënë vend në fokusin e publikut.
“Jam me të vërtetë shumë i lumtur që jemi bashkë këtu për të ndjekur promovimin e përmbajtjeve gazetareske të prodhuara nga kolegët në periudhën e kaluar në bashkëpunim me Institutin Gete – Shkup. Më gëzon për dy arsye: E para është se bëhet fjalë për përmbajtje cilësore, të cilat janë përgatitur me shumë përkushtim, në pak minuta do ta dëshmoni edhe vetë këtë. Arsyeja e dytë është solidariteti mes kolegëve, që në fakt ishte një nga qëllimet e kësaj thirrjeje publike që e realizuam së bashku me Institutin Gete – Shkup. Temat e trajtuara ishin të natyrës sociale, pra çështje që lidhen me perceptimin e shoqërisë për jetën personale të njerëzve. Shpeshherë, të gjithë ne si pjesëmarrës në shoqëri e dimë që ato ekzistojnë, por për arsye të ndryshme nuk arrijmë t’u japim rëndësinë apo vëmendjen që meritojnë. “
Katrin Ostvald-Rihter tha: “Ne jemi mbledhur sot këtu sepse disa prej jush kanë bërë një punë të shkëlqyeshme për të dokumentuar çështjet sociale në vendin tuaj, duke i bërë ato të prekshme dhe të dukshme përmes mjeteve dhe metodave gazetareske. Ne ishim shumë entuziastë për temat e zgjedhura nga juria dhe me të vërtetë jemi shumë të kënaqur me rezultatet. Do të doja të shfrytëzoja rastin për të falënderuar sinqerisht Shoqatën e Gazetarëve të Maqedonisë, udhëheqësin e projektit dhe pjesëmarrësit. Në çdo rast, urojmë që ata të arrijnë një audiencë sa më të madhe”.
Konkursi ishte i shpallur në muajin qershor dhe ishte i lidhur me temat sociale, pra çështjet që kishin të bënin me perceptimin e shoqërisë për jetën personale të njerëzve. Shoqëri të ndryshme kanë perceptime të ndryshme dhe ajo që mund të jetë sjellje “normale” në një shoqëri, mund të cilësohet si një çështje e rëndësishme sociale në një shoqëri tjetër. Temat sociale mbulojnë një gamë të gjerë temash dhe mund të jenë në fushën e shëndetit publik, mjedisit jetësor, të drejtat e komunitetit LGBT si dhe grupeve të tjera të margjinalizuara, të drejtat e njeriut, tema me interes publik lokal tipike për zonat rurale si dhe barazisë gjinore.
Përmbajtjet e krijuara do të publikohen në faqen e internetit të Shoqatës së Gazetarëve të Maqedonisë në fund të muajit tetor.
