SHGM: Dënojmë ngjarjet e sotshme në MASH
Shoqata e Gazetarëve të Maqedonisë dënon ashpër sjelljen e të punësuarve në Ministrinë për Arsim dhe Shkencë dhe anëtarëve të Komisionit disiplinor ndaj gazetarëve të cilët kanë dashur të ndjekin mbledhjen e sotshme të Komisionit në të cilin ishte e parashikuar të diskutohet për inspektorin Gjorgji Ilievski. Përndryshe, kundër Ilievskit është ngritur masë disiplinore pasi që ai zbardhi informata që hedhin dyshime mbi promovimin e paligjshëm të titujve shkencorë nga zyrtarët e tanishëm qeveritarë nga radhët e BDI-së.
Prania e gazetarëve dhe e publikut në seancat e këtij lloji është me rëndësi të jashtëzakonshme për të siguruar një procedurë të drejtë dhe transparente, veçanërisht kur bëhet fjalë për një çështje me interes për publikun e gjerë. Degradimi dhe mosrespektimi i gazetarëve është i papranueshëm në një shtet demokratik sepse gazetarët janë sytë dhe zërat e publikut.
Sipas gazetarit Vasko Magleshov, i cili u përpoq të ndiqte seancën, gazetarëve nuk iu lejuan të merrnin pjesë në mbledhjen e sotshme, por u urdhëruan të largoheshin nga ndërtesa. Kryetarja e Komisionit bëri atë në dorë të veten, duke mos u thirrur në ndonjë ligj që i lejon ta bëj atë.
Shoqata e Gazetarëve të Maqedonisë kërkon nga Ministri për Arsim dhe Shkencë, Arbër Ademi, t’u kërkojë falje gazetarëve dhe ta dënojë publikisht këtë rast. Gjithashtu, presim që ai të fillojë procedura kundër anëtarëve të Komisionit nëse dëshmohet se ato kanë vepruar në kundërshtim me rregulloret dhe kanë shkuar përtej kompetencave të tyre.
