SHGM braktisi brifingun me Tomovskën
Shoqata e Gazetarëve të Maqedonisë sot mori pjesë në brifingun e organizuar nga Ministria për Shoqëri Informative dhe Administratë, ku ministrja Marta Arsovska Tomovska prezantoi propozim ligjin për fushata informative dhe reklamuese të institucioneve publike.
Pas fjalës së ministres Arsovska, përfaqësuesit e SHGM-së prezentuan qëndrimet e tyre parimore lidhur me brifingun dhe propozim ligjin. Shoqata refuzon të merr pjesë në diskutimin material për konceptin e ligjit, për shkak të organizimit të keq të mbledhjes nga Ministria. Ligji u publikua në web faqen e Kuvendit pak para takimit, ku nuk u ftuan të gjitha palët e interesuara. Kërkuam, por nuk morëm shpjegim se pse në takim nuk janë ftuar kolegët e Sindikatës së Gazetarëve, Këshillit të Etikës, Institutit Maqedonas të Mediave, Institutit për studime të komunikimit, etj. Ministrja Tomovska nuk arriti të na mbrojë nga ofendimet e drejtorëve të Kanal 5 dhe Alsat-M, Ivan Mirçevski dhe Lirim Hajredini, të cilët me fjalor të pahijshëm u vërsulën ndaj përfaqësuesve të SHGM-së.
Për më tepër, ministrja nuk kishte përgjigje nëse ky propozim ligj është rezultat i bisedimeve mes partive politike nënshkruese të Marrëveshjes së Përzhinos, ose vetëm i partive në pushtet, VMRO DPMNE dhe BDI. Gjithashtu, nuk kishte përgjigje as nëse garantuesit e Marrëveshjes së Përzhinos, SHBA dhe BE, janë të njoftuar dhe janë në rrjedha me procesin e përgatitjes të konceptit të ligjit. Arsovska-Tomovska tentoi të keqpërdorë raportet e faktorit ndërkombëtar duke i interpretuar në mënyrë selektive pjesët me të cilat pajtohet, ndërsa duke anashkaluar pjesët e tjera.
Qëndrim parimor i SHGM-së, që u potencua në takim, është se me ligj të tillë do të legalizohet korrupsioni në media, fakt që u zbardh nga bombat e opozitës. Në këtë mënyrë, reklamat qeveritare do t’i shndërrojnë mediat në peng të interesave politike dhe ekonomike të Qeverisë dhe pronarëve të mediave. Është obligim i institucioneve publike që t’i bëjnë publike të gjitha informacionet për punën e tyre, e jo paratë publike t’i shfrytëzojnë për promovim ditor të politikave qeveritare. Me këtë mediat bëhen tabelë shpalljesh e Qeverisë, të paguar me para publike.
Reklamat qeveritare do të kenë ndikim të madh në tregun mediatik, ku Qeveria deri tani ishte shpallësi më i madh. Pozicioni i tillë i Qeverisë jep mundësi që të kontrollojë politikën redaktuese në media dhe kështu ta ngulfat kritikën.
Në vend të reklamimit, SHGM propozon që paratë e njëjta të cilat Qeveria i ndan për promovim mediatik, t’i destinojë për subvencionimin e mediave, përmirësimin e kualitetit të përmbajtjeve mediatike, pasurimin e pluralizmit politik, përkrahje për mediat e pakicave dhe për trajnimin e gazetarëve.
Shoqata paralajmëroi se me koncepte të tilla të gabuara, do të përkeqësohet edhe më tepër situata në media dhe druan se Maqedonia do të mbetet në grupin e vendeve jo të lira, si Bjellorusia, Rusia dhe Turqia.
