SHGM: Ankesa në KSHZ dhe MPB për pengimin e punës së gazetares Ferikan Arifi
Shoqata e Gazetarëve të Maqedonisë (SHGM) sot paraqiti dy ankesa për pengimin e punës së gazetares Ferikan Iljazi Arifi nga Euronews në Komisionin Shtetëror Zgjedhor (KSHZ) dhe Departamentin e Kontrollit të Brendshëm të Ministrisë së Punëve të Brendshme (MPB). Ankesat i referohen qëndrimit joprofesional të përfaqësuesve të Komisionit Zgjedhor Nr. 1974 dhe të një nëpunësi policor ndaj koleges Arifi në ditën e zgjedhjeve, përderisa ajo raportonte zyrtarisht për procesin gazetaresk.
Megjithëse gazetarja u prezantua me rregull dhe mbante shenjën e gazetarit në një vend të dukshëm, kryetarja e bordit zgjedhor Isnije Mirta në vendvotimin në Shkollën e mesme “Kiril Pejçinoviq” në Tetovë nuk e lejoi atë të filmonte dhe në të njëjtën kohë me kolegë të tjerë nga bordi para votuesve e nënvleftësoi gazetaren duke thënë “nuk e din ligjin dhe duhet të të vijë turp që e ndërpren procesin zgjedhor”.
Një incident tjetër ndodhi gjatë ditës përsëri në Tetovë në oborrin e shkollës së mesme ku një zyrtar nga MPB-ja, për të cilin raport është dorëzuar tashmë në SPB Tetovë dhe Departamentin për Standarde Profesionale, në vend që të lejojë gazetaren të punonte lirshëm, e pengonte punën e saj.
Në momentin kur gazetarja e filloi video transmetimin e drejtpërdrejtë në oborrin e shkollës, nëpunësi policor me një ton të vrazhdë këmbënguli që gazetarja menjëherë ta tregojë kartën e identitetit për të vërtetuar se ajo është gazetarja e cila është e shënuar në bexh ose përndryshe ajo nuk do lejohet të xhirojë. Megjithëse gazetarja i vuri në dukje nëpunësit policor se ajo nuk e kundërshton kërkesën e tij për identifikim dhe i kërkoi që ta lejonte të përfundonte atë që kishte filluar, pas së cilës ajo do të identifikonte veten, kjo nuk iu lejua ta bënte. Polici e udhëzoi në mënyrë të vrazhdë që të linte oborrin e shkollës, duke e penguar kështu që të raportonte nga terreni në punën e saj si gazetare.
SHGM do t’i ndjekë me kujdes ankesat për këtë rast tek institucionet kompetente si dhe tek të gjithë të tjerët që mbërritën në Zyrën e SHGM-së dhe që kanë të bëjnë me pengimin e punës së gazetarëve nga procesi zgjedhor për zgjedhjet lokale për vitin 2021.
