SHGM: Ali Ahmeti nuk guxon të etiketojë mediat

Shoqata e Gazetarëve të Maqedonisë-SHGM dënon etiketimin publik të televizioneve Telma dhe Alfa nga kryetari i Bashkimit Demokratik për Integrim (BDI), Ali Ahmeti. Ai në fjalimin e tij para të pranishmëve në tribunën e partisë në Gostivar, në përpjekje për të shprehur pakënaqësinë e tij me raportimin mediatik të aktiviteteve partiake, tha publikisht se këto dy televizione janë armiqësore.

Kjo deklaratë skandaloze është e dëmshme dhe mund të kërcënojë sigurinë e gazetarëve dhe punonjësve të medias, duke nxitur kështu censurën në një kontekst më të gjerë. Deklarata është në veçanti problematike sepse vjen nga kryetari i një partie politike që është pjesë e Qeverisë dhe mund të stimulojë sulme dhe kërcënime ndaj mediave dhe gazetarëve nga anëtarët e partisë dhe kjo mund të sjellë pasoja shumë negative për lirinë e shprehjes.

Besojmë që zyrtarët publikë, e veçanërisht liderët e partive politike, duhet të përmbahen nga deklaratat që etiketojnë mediat sepse kjo është në kundërshtim me vlerat evropiane që vetë politikanët po përpiqen t’i promovojnë te qytetarët.

I rikujtojmë Ahmetit, por edhe kolegëve të tij nga partitë tjera politike, se gazetarët janë zëri i publikut dhe detyra kryesore e tyre është të hetojnë dhe të bëjnë pyetje që janë me interes publik ndërsa politikanët janë ata që duhet t’u përgjigjen atyre pyetjeve dhe të ofrojnë kushte të sigurta për kryerjen e punës së tyre.