Sekullovski në Këshillin Kombëtar për Eurointegrime: Institucionet vendore të kërkojnë me kohë vazhdimin e programeve për lirinë e mediave

Drejtori ekzekutiv i Shoqatës së Gazetarëve të Maqedonisë, Dragan Sekullovski, në cilësinë e përfaqësuesit të SHGM-së në Këshillin Kombëtar për Eurointegrime, sot mori pjesë në mbledhjen e tetë të Këshillit në Kuvend.

Gjatë takimit të punës, i cili u mbajt së bashku me Komisionin për Çështje Evropiane, ambasadori i Republikës së Irlandës, Brendan Ward, prezantoi programin dhe prioritetet e Presidencës irlandeze me Këshillin e Bashkimit Evropian për periudhën korrik-dhjetor 2026.

Në fjalimin e tij, Sekullovski theksoi se integrimi evropian, sundimi i ligjit, liria e mediave dhe siguria e gazetarëve janë çështje të ndërlidhura, të cilat kërkojnë mbështetje të vazhdueshme dhe të koordinuar nga institucionet vendore dhe evropiane.

Ai rikujtoi se gjatë dhjetë viteve të fundit, programet e përbashkëta të Bashkimit Evropian dhe Këshillit të Evropës, fillimisht JUFREX dhe më pas PRO-FREX, kanë pasur rol të rëndësishëm në avancimin e lirisë së shprehjes dhe lirive mediatike në Maqedoninë e Veriut dhe në rajon.

Përmes këtyre programeve mbështetje kanë marrë gazetarët dhe organizatat mediatike, por edhe gjyqtarët, prokurorët, avokatët, rregullatori mediatik dhe institucionet e tjera të pavarura. Aktivitetet kanë qenë të orientuara drejt sigurisë së gazetarëve, qasjes në informacione, rregullimit mediatik, zbatimit të praktikës gjyqësore evropiane dhe përballjes me sfidat e reja digjitale.

“Faza aktuale, e tretë, e Instrumentit Horizontal të Bashkimit Evropian dhe Këshillit të Evropës zgjat deri në dhjetor të vitit 2026. Prandaj, Qeveria, Ministria për Çështje Evropiane, Kuvendi, rregullatori mediatik, institucionet gjyqësore dhe organet e tjera kompetente duhet që tani t’i përcaktojnë së bashku prioritetet dhe të kërkojnë qartë vazhdimin e kësaj mbështetjeje. Nuk duhet të presim që programi të përfundojë dhe vetëm më pas të konstatojmë se kemi nevojë për bashkëpunim të mëtejshëm dhe forcim shtesë të kapaciteteve institucionale”, theksoi Sekullovski.

Sipas tij, kjo çështje është veçanërisht e rëndësishme në kontekstin e Presidencës irlandeze me Këshillin e BE-së, ndër prioritetet e së cilës janë vlerat evropiane, sundimi i ligjit në vendet kandidate, qëndrueshmëria e demokracive dhe përparimi i procesit të zgjerimit.

Vazhdimi i programeve rajonale të Komisionit Evropian, para së gjithash i programeve IPA, si dhe i programeve të Këshillit të Evropës, të mbështetura përmes fondeve evropiane, do të përbënte një mënyrë praktike që këto prioritete të shndërrohen në reforma konkrete në vendet kandidate.

Sekullovski theksoi edhe përvojën e rrjetit rajonal SafeJournalists.net, në të cilin SHGM bashkëpunon me shoqata dhe sindikata të gazetarëve nga edhe shtatë vende të tjera. Edhe pse problemet në secilin shtet burojnë nga rrethana të ndryshme kombëtare, sulmet ndaj gazetarëve, joefikasiteti institucional, presionet politike dhe ekonomike, si dhe kërcënimet digjitale, shpesh kanë forma dhe shkaqe të ngjashme.

“Qasja rajonale është thelbësore, sepse mundëson shkëmbimin e përvojave, identifikimin e trendeve të përbashkëta dhe zbatimin e zgjidhjeve që tashmë janë dëshmuar si efektive në vende të tjera”, theksoi ai.

Në fjalim u nënvizua edhe rëndësia e përvojës irlandeze në fushën e rregullimit digjital dhe mediatik. Një numër i madh i platformave më të mëdha online, si Meta, Instagram, Twitter dhe të tjera, i kanë selitë e tyre evropiane në Dublin të Irlandës, për këtë arsye institucionet irlandeze kanë një rol të rëndësishëm në zbatimin e rregullave evropiane për shërbimet digjitale.

Në të njëjtën kohë, vendet kandidate, përfshirë edhe Maqedoninë e Veriut, vazhdojnë të përballen me kufizime serioze në mbrojtjen e të drejtave të qytetarëve dhe gazetarëve kur shkeljet ndodhin në platformat e mëdha digjitale.

Sekullovski u ndal edhe te paditë strategjike kundër pjesëmarrjes së publikut, të njohura si SLAPP, duke theksuar se ato nuk janë problem vetëm për gazetarët dhe nuk paraqesin vetëm problem kombëtar, por edhe rajonal.

“Keqpërdorimi i procedurave gjyqësore mund të drejtohet ndaj kujtdo që merr pjesë në një debat me interes publik: ndaj organizatave të shoqërisë civile, aktivistëve, ekspertëve, qytetarëve, por edhe ndaj përfaqësuesve të zgjedhur dhe politikanëve. Mekanizmat anti-SLAPP nuk nënkuptojnë lirimin nga përgjegjësia legjitime, por mbrojtjen nga procedurat që kanë për qëllim frikësimin, rraskapitjen financiare dhe heshtjen e zërave kritikë”, tha ai.

Në fund të fjalimit, Sekullovski u bëri thirrje institucioneve vendore që, në kohë dhe në mënyrë të koordinuar, të kërkojnë vazhdimin e programeve të Bashkimit Evropian dhe Këshillit të Evropës, ndërsa Presidenca irlandeze të mbështesë vazhdimësinë e tyre në kuadër të ndihmës evropiane dhe programimit të ardhshëm për vendet e Ballkanit Perëndimor.

“Kjo nuk është kërkesë për mbështetjen e vetëm një profesioni. Përfitimi përfundimtar është për të gjithë shoqërinë: institucione më të forta, rregullim më i mirë, gazetari më e sigurt, debat publik më cilësor dhe qytetarë më të informuar. Rezultati më i mirë do të ishte një shoqëri në të cilën pikëpamjet e ndryshme përballen me argumente dhe jo me presione, kërcënime apo keqpërdorim të institucioneve”, përfundoi Sekullovski.

Foto: Kuvendi.mk